Ram inchuh buaina chinfel vat a ngai

Kolasib District Land Owners Association chuan Kolasib district chhunga NH 06 leh 306 (Silchar-Aizawl) kawngpui chu September 25, 2025 aṭangin tiam chin awm loa dan an tum thu an puang.

Kawng dan an tum chhan an tarlan chu - NH kawngpui kam ramte neitu nihna sorkarin a chinfel vat phût vang te, Riverine Reserved Forest Notification 1965 chu ram hmasawnna dâltua ngaia ṭhiah an phût vang te, NH four lane project tihhlawhtlin phût vang te, sorkarin an ram kum 3 chuang a khuahkhirhsak tawhna sût phût vangte a ni.

Silchar-Aizawl kawngpui thlûr lia siam turah hian kawng siamtu tur contractor/company-te chuan, kum 3 vel kal ta khan Vairengte bul lawkah kawng laih leh siamna tur hmanrua eng emaw zat an chhawp tawh a; mahse, tun thlengin hna an la ṭan thei lo.

Hna thawh ṭan theih a la nih loh chhan hi ram lak chungchang tihfel a la nih loh avang a ni ber. Zangnadawmna package ṭhenkhatah pek a nih tawh laiin, package ṭhenkhatah pek a la ni lo. Zangnadawmna pek a la nih loh chhan hi ram neitute ram Forest department lamin roadside reserved forest chhuanlama a chuhpui vang nia sawi a ni.

Roadside reserved forest chin hi kawngpui kam tawn tawnah metre 800 chin nia sawi a ni. Heti a nih chuan roadside reserved forest hi humhalh a ṭhat viau rualin, hun kal tawh leh tuna hun tawn mekah a nihna ang taka kalpui theih niin a lang lo.

Mizorama NH kawngpui zawng zawngin a paltlangah hian khaw chhung bikah chuan mimalin ram an nei a, in tam tak sak a ni tawh a, an sa mek zel bawk. Tuna khaw chhung ni lo-ah pawh mimal ram tam tak a awm a, Vairengte leh Aizawl inkara NH kam ram zawng zawng hi mimal ram a ni vek tawha sawi a ni ṭhin. Chu'ng mimal ramte chu sorkar (Revenue department)-in a pek tawh a ni tlangpui bawk.

Kum 3 chuang kal ta aṭangin NH 06 leh 306 hi thlûr li a nih theih nan zauh tura tih a ni tawh a, mahse, tun thlengin hna thawh theih a la ni lo; ram neitu nih inchuhna vang a ni.

NH kawngpui kama ram, sorkarin a pek ngei mimalte leh sorkar (EFCC department) inkara ram inchuh buaina hi Mizoram sorkarin a chinfel thuai a ngai. Chuti a nih loh chuan NH thlûr lia siam tur hi pàmṭùl a ni lo ang tih sawi theih a ni lo; pàmṭùl a nih chuan Mizoram hmasawnna tur tihṭhuanawpna lian tak a ni ang.