Court thutlukna

Lunglei Civil Hospital-a thawk ṭhin nurse pakhat, Lunglei District Court-in thiam loh a chan-tir tawh chu Lunglei District Court-a chief judicial magistrate chuan tan ina khung loin a chhuah. Court judgement-a a lan danin, CJM chuan nurse hi thubuai vanga a lo tawrh tawhna leh hremna a lo tawrh tawhte chu hremna tlingah a ngaihsak a, chhungkaw châwmtu a nih vang te, criminal record a la neih ngai loh vang te, insiam ṭhatna hun pek duh vang te, a chung thu ngaihtuah a nih chhungin
ṭha taka a awm vangtein Probation of Offenders Act Section-3 hmangin a chhuah a; chhuah a nih hmain an zilhhau bawk a ni.

Court thutlukna a ni a, he thutluknaa lungawi lo chuan court sang zawkah a khing thei a, chuta kalpui kan tum lo a nih chuan court thutlukna sawisel hi thil awmze nei lo a ni. He thutlukna hi mipuiin chhan hrang hrang avangin an ngaihven a, eizawnna pawimawh taka hnathawktu chungchang a ni a, chumi piah lamah political party pakhat an lo lang nawlh bawk a, a kal zel dan hi mipuiin an ngaichang reng a ni.

Court hian he nurse hi a thil tih dan dik loa a hriat avangin thiam loh a lo chantir tawh a, a hremna erawh a la puangzar lo. Thiam loh chantir a nih hnu, a hrem dan tur puanzar a nih hma si hian a hnathawhpuite lam lungawi lo an inpun khawm a, political party lam an lo lang bawk. Tunah a hrem dan tur puan a ni a, tan ina khung zui loin thiam loh chantir a ni chungin chhuah a ni.

Hei hi a âwm loa ngai an awm a, chutih rualin thiam loh chantir a ni zawk kha âwm lo hle zawka ngai an awm bawk. Mipui ngaihdan chu a thuhmun thei dawn lo a, court thutlukna a nih avangin sawisel zui emaw, vei zui vak emaw awmzia a nei vak lo a; lungawi lo tan chuan court sang zawka kalpui mai chu tihdan awm chhun a nih hmel. A pawimawh ber chu court hian rilru fim tak nen thutlukna a siam turah ngai ila, roreltute berin an rel fel tawh hnuah hi chuan court thutlukna zah thiam leh pawm thiam zir hi a ṭha ber mai awm e.