Rangkachak tawlhruk thubuai

Mizoram sorkar chuan rangkachak tawlhrûk suam thubuai chhui tura ngenna Central Bureau of Investigation (CBI)-ah a thawn tawh a, CBI aṭangin chhanna an la dawng lo. Rangkachak kg. 50, cheng vbc. 14.5 vel hû tawlhrûk phurtu December 14, 2015 zana suam thubuaiah hian mi 14 man an ni tawh a, mahse an vaiin Court chuan bail-in a chhuah a ni.

Rangkachak tawlhruk thubuai hi a kal zel dan tur hriatthiam a harsa a, mipui mimir (layman) tan phei chuan thil awm dan hi thlir thiam a harsa takzet tawh a ni. Rangkachak tawlhruk a nih thu hre chiang a, a phurtu nia inchhalte ngei pawh man an nih loh dante, dan loa cheng vaibelchhe tam tak hu thil che vela tumah hlin an la ni lote hi mipui nawlpui tan chuan a chhan hriatthiam a harsa hle.

He thil hi hetia zuih ral mai tur a nih chuan a pawi dawn hle mai a, Mizoram hi dan loa thil tawlhruk awlsamna, thil tawlh rutute an zalenna leh 'smuggler' tia miin an puh theih mai turte pawh an duh anga an khawsak theihna ramah kan chhuah mai ang tih hlauhawm ta.

Police lamin a rangkachak bo lam aiin insuamna thleng hi an ngaimawh zawk leh an chhui tur zawk a nih thu an sawi a, anni lam hi chuan silai nena intin chunga insuam hi an ngaih serious lai ber niin a lang. Mipui lamina rangkachak leh a pawisa in-hnamhnawih tam avangin helam hi kan hawi ṭhup a, Police mit aṭang chuan heng thil hi Custom lam chan a ni. Custom lamin chhui zui vak an tum bik lo a, a mantu an ni lo a, rangkachak hi a bo ngei tih finfiahna awm lo a, an tawlh ru ngei tih an hriat theih bawk si loh avangin an kut an sil a ni ber.

CBI meuh pun an ni a, anni lam lahin ngawih an la chuh tlat mai si a; Mizorama insuamna lian tak thleng, cheng vaibelchhe 14 vel inhnamhnawihna thubuai hi a hlamzuih mai lohna turin eng thil emaw tih a ngai a, thuneitu lam an ṭan a ngai e.