Eptute tih tur

Sorkar laipuiin Pradhan Mantri Awas Yojana (PMAY) hnuaia India rama in nei lote tana in a sak sak dan tur, Housing For All a kalpui mek chu MNF lam chuan ṭha taka vil reng an tum thu an sawi. He ruahmanna ṭha tak hi party-a inthlêm luhna hmanruaa hman an phal lo a, ruling party mi leh sa induhsakna tur a nih loh thu an sawi.

Mizorama eptu party lian berin sorkar thil kalpui tura aw an chhuah hi a ṭha hle mai a, sorkar pawhin he ruahmanna ṭha tak hi a nihna angin an kalpui theih a beiseiawm. Sorkar laipui
aṭanga ruahmanna lo kalte leh state sorkarin hamṭhatna a siam vete hi ruling party mi leh sa induhsakna atan an hmang ṭhin hi a pawi a, hei hi Mizoram ṭhanmawhbawk a ni.

Tuna Housing For All hi dik taka kalpui a nih chuan Mizorama mirethei zawkin a hlawkna an tel dawn a, mirethei tam tak awm zinga ruling party lam chiah duhsak an nih chuan a kalphung hi a dik dawn lo a ni. Hemi kawngah hian eptu lamin an tih tur an tih a ngai a, sorkar thiltih a nih vang hrim hrima dodal tum loin, sorkar khalh ngil turin rilru pu se a ṭha khawp mai.

Housing For All-ah kher ni lo, thil pawimawh dangah pawh tun aiin eptu lam hian aw chhuah ngun deuh se, ngun zawkin lo inzir peih se, sorkar pawh a fimkhur sawt ang. Eptu lam an chak loh a, ngawih an chuh a, sorkar thil tih an thlir mai mai a nih chuan an hna an thawk ṭha lo tihna a ni a, ramin hma a sawn dawn chuan ruling party ṭha tak neih bakah opposition party neih ṭhat hi a ṭul tel reng a ni.