BPL awm lohna khua

Khawzawl RD Block chhunga khaw panga - Riangtlei, Pâmchung, Rabung, Tlângmawi leh Chawngtlâi khuaah below poverty line (BPL) chhungkua an awm lo.

Tunlaiin Mizoram sorkarin BPL base-line survey a nei mek a, Khawzawl block hnuaiah ringawt pawh khaw panga chuan BPL an neih loh thu an tichiang tawh a, an fakawm khawp mai. Sorkarin BPL a tehna hi dik leh fir taka kalpui chuan, BPL nia inchhal chhungkaw tam tak hi chu BPL an ni lo a, mahni nihna anga lan ngam hi a ṭha khawp mai.

Mizoramah khaw tam tak a awm a, heng zingah hian Khawzawl RD Block hnuaia khaw pangate anga dik taka thil kalpui ngam a, an nihna ang taka lang ngam an awm a nih chuan BPL awm lohna khua hi ṭhahnem zawk an awm thei ang. Mizoramah hmasawnna kai rual loin mi hausa leh rethei inkarte zau viau mah se, India ram hmun danga miretheite retheihna aṭanga teh chuan Mizorama mite hi chu kan la ziaawm hle a, BPL-a inziak lut zingah pawh hian a taka BPL ni lo tam tak an awm thei ang.

Sorkar official lam chuan BPL ni si lo BPL anga inziak lutte an hnawksak thu an sawi tawh a, hei hi ngun taka ngaihtuah zui ngai a ni. BPL-in hamṭhatna an dawn theih avanga mahni nihna aia hniama lan tum a, rethei zual bik zinga inziah luh hreh lo kan awm hi a pawi a; hengte hi kawng lehlama sawi chuan 'eirukna' kan tihte nen hian huang khatah a khung theih ang.

Sorkar-a hna pawimawh chelh chinah sorkar pawisa chheprelh hreh lo leh ziak bo duh an awm ṭhin a, heng mite hian dem an hlawh a, dem tur pawh a ni. Hetiang chiah hian retheite tana hamṭhatna duh vanga rethei tehna pêl tawh chunga BPL-a inziak lut an awm chuan a fel lo a, hei hi thil dik lo a nih tih pawmin BPL dik takte chiah hi BLP ni se a ṭha ngawt mai.