Contractor-te hna vilpui

Tantia Constructions-in Serchhip Sailiamkawn leh Buarpui inkar kawng an siam mek leh Thenzawl-Zote kawng RCC-a siam mek chu YMA sub-headquarters, Serchhip hnuaia Vigilance & Monitoring Committee member-te chuan an enfiah a; duhthusam lo laite siam ṭhat leh dan tur contractor-te nen an sawiho.

Mizoramah hian hmasawnna tur sum hi a lut lo a ni lo a, sum lo lut kan hman dan hi a dik loh vangin hma kan sawn chak lo a ni. Mihring nuai 10 vel enkawlna tura sorkar laipui aṭanga sum lo lut hi a tlem hauh lo a; nimahsela kalphung fel lo leh chin ṭhan dan dik lo kan neih tam tawh avangin kan ram hi a rum ṭhin a ni.

Mizorama contract hna kan kalpui dan hi a dik lo thûk hle tawh a, hnam dang contractor lian kan rawih dante thlengin en fel a ngai a ni. Contract pe theitute leh contractor-te inkara 'inhriatthiamna' awm ṭhin hian a hna vil thlengin a nghawng a, lei dawh chimtute leh lei dawh zo thei lote chungah pawh sorkar a inlek khawng ngam lo hi chu a demawm hle a ni.

Tunah chuan RTI Act hman a ni tawh a, mipui pawhin contract hnathawh a ni emaw, sorkar hnathawh dan hrang hrangte hi an duh chuan an zir chiang thei. A zirchiangtu tura ruat an awm bik lo a, Mizoram tana mi ṭhahnemngai tu pawhin heng hnathawhte hi an en thei. YMA lamin ram tana ṭhahnemngaia zir chian hna an thawk hi a lawmawm a, contractor-te hi vilpui an ngai hle a ni.

Hnam dang contractor-te hnathawh chauh ni lo hian, Mizo contractor-te hnathawhte hlei hlei hi zir chian theih a ṭha khawp mai. Contractor tute emaw hming hawha hna lo nei ve maite an awm a, hna inlei chhawnte thlengin a awm a, hetianga kan kal avang hian hmasawnna hnain a tuar ṭhin a ni.

Contractor-te hna vilpui hi kan tih tur a ni a, a viltu tura ruat bik an awm loh avangin ram tana mi ṭhahnemngai tu pawhin contractor-te hna hi an vilpui thei a, contractor hna hi vilpui a ngai takzet a ni.