Sumdawnna lirthei

Mizoram State Transport Authority (STA) chuan Aizawla two wheeler taxi kalpui dan turah ruahmanna an siam a, hei bakah hian sumdawnna lirthei (public transport vehicle) atan kum 10 aia upa tlantir loh an rêl a, kum 10 aia upa neitute chu an motor thlak (replace) phalsak an ni ang.

Sumdawnna lirtheite hi tun hnaiah an nuar a, khawsak phung pawh a buai phah hle a, an nawrh chhan thil ṭhenkhatte sorkarin ngun zawka a ngaihtuah hnuaha tihhlawhtlinsak dawn niin a lang a, a lawm-awm hle. Hetihlai hian sumdawnna lirthei enkawltute hian bat an nei tih inhre tel se, mipui hnena an pek let ve tur lam hi ngaihtuah tel se a ṭha khawp mai.

Kan sumdawnna lirtheite hi faina kawngah an ṭan hmasak a ngai a, lirthei pawn lam enkawl fai leh chei mawi lamah hi chuan driver-te hi an taima tlangpui a; nimahsela an lirthei awm chhan passenger-te ṭhutna lam hi a balin a ṭawp tlangpui. Bus leh maxi cab ṭhutna ṭawp tak takte a tam hle a, mi tenchhe deuh tana chuan huphurhawm khawpa balte pawh a awm ṭhin. Man chawia chuang ṭhin passenger-te tana nuam leh hahdam hi ngaihtuah thleng se a ṭha khawp mai.

Lirthei khalhtu lamin zin kawnga an lirthei kalpui dan pawh hi inzir kan la ngai khawp mai. Chhuah hun hi chu an zawm dik sawt viau tawh a; nimahsela hmun hla deuh zin dawnin driver remchanna zawk ngaihtuaha chawlh mai mai te, a chuangte tana a hrehawm theih dan lam ngaihtuah loa tlan chak leh hmanhmawh lutukte a awm ṭhin a, lirthei an tlantir chhan hi passenger-te an ni tih an hriat chian a
ṭha hle.

Sumdawnna lirthei kan enkawl leh kalpui danah hian zawi zawia hma kan sawn a ṭul mai a, tunah rih hi chuan an duh hunah an nuar a, an tana ṭha tur lam hi an la dah pawimawh zawk niin a lang a; lirthei an neih chhan mipui tana remchang, mipui nawmna leh mipui tana ṭangkai tur lamah ngaihtuahna seng deuh deuh se a ṭha khawp mai.