Fur kawngpui

Fur a lo ni leh ta a, kum dang ang bawkin Mizoramah kawngpui kal hleihtheih loha chhia leh diak a awm a, lei min vanga ping a awm a, kan kawng neih sate pawh ruah tui vangin a chhe leh ṭan mek bawk a, hei hi kum tina thil thleng ṭhin a ni.

Mizoram hi fur ruahtui tlak tamna ram a ni a, kan ram a awihin a chhengchhe si a, kan kawngpuite a ṭha rei thei lo hi thil mak a ni lo. Ruah a sur a, lei a min miau chuan inven lawk theih a ni lo a, kum tina thleng ṭhin ni mah se inrin lawk thiam a harsa hle a ni.

Hetihlai hian mihringin a ven theih thil tam tak a awm ve bawk a, hemi kawngah hian sorkar hian dem a kai lo thei lo. Kawngpui pawimawh ni si tui luanna ṭha lo tam tak a awm a, ven vek sen ni lo mah se a langsar bik leh kawngpui lun bikte hi chu ven theih ni se a
ṭha ngawt mai. Kan inkal pawhna kawng pawimawh ber zinga mi ni si, siam loha kan zuah rei lutuk ṭhinte leh a inven theih hunlaia kan ngaihthah tlat ṭhin hi kan tuar a ni.

Hetihlai hian kawngpui vengtu lam pawh hi fak an phuna chin a awm tho a, hmun pawimawha lei min a awm chuan zan khaw tairekah pawh an thawk chhuak a, zin veivakte an tangkhan lohna turin ruahsur hnuaiah pawh an thawk a, sorkarin sum remchang a neih lohlai pawhin sum dap khawmin hna an thawk ṭhin a, fak an phu hle a ni.

A pawimawh ber erawh chu mipuiin kawngpui ṭha an mamawh a, furah a ni emaw ni lo emaw mipui hian kawng ṭha neih hi an duh a, an mamawh. Tun thlenga Rangvamual bula lei min sorkarin duhthusama a siam thei lote hi chu a demawm a, lei chim siam tura an hun duh rei dante kha a mak hle. Fur lo thleng tur hre renga kawngpui pawimawh an siam ṭha thei tlat lote, mipuiin harsatna an tawh theih dan hre reng chunga sorkar a ṭang hleithei chuang miah lote hi chu phun loh theih a ni lo e.