Bána Kaih Scheme hlawhtlinna tur
Mizoram sorkar flagship programme 'Mizoram Bána Kaih (Handholding) Scheme' chu September 19, 2024 khan Chief Minister-in a tlangzarh ta a, he scheme hnuaia ṭanpuina dil duh tan dilna hun hawn nghal a ni.
India ramah hian sorkar thar a dinin sorkarna siamtu political party-te'n policy an neih ang zelin flagship programme a awm fo a, Mizoramah pawh a lo awm tawh ṭhin. Mizorama sorkar ding tawhte'n an flagship programme an tihhlawhtlin danah erawh ngaihdan a inang lo àwm e.
Sorkar flagship programme rêng rêng a ṭha tlangpui a, duan a nih ang taka tihpuitlin ni se chuan ram leh mipuiin nasa taka hma an sâwnpui theih tur a ni. Mahse, tuna kan dinhmun thlirin, ram leh mipui náwlpuiin hma an sawn phah lutuk lo ṭhin niin a lang a; a nih dan tur anga sorkarin a kalpui loh vang emaw, mipuiin an tih tur an tih tâwk loh vang emaw a ni ang.
Bána Kaih Scheme-ah hian mipuiin beiseina sang tak an neih avangin a hlawhtlin ngei a ṭul a, duan a nih ang taka a hlawhtlin theih nan sorkarin theihtawp a chhuah a ngai. Mipuiin beiseina sang tak an neih avangin tuna sorkar mek pawh hi mipuiin an thlan tlin chhan lian ber a nih a rinawm.
Handholding Scheme a hlawhtlin ngei theih nan sorkar hotu te, official-te leh ṭanpuina dawngtute an pawimawh em em vek. Sorkar (ministry)-in tih tak zetna nen ṭhahnemngai takin theihtawp an chhuah a ṭul a; sorkar hnathawkte'n an tih tur chinah inpekna thûk tak nen, sorkar kutke, sorkar policy tihlawhtlingtu tur an ni tih inhre chunga an bawhzui a ngai.
Chief Minister-in, "Bána Kaih Scheme hi thawk rim leh taimate tana siam a ni," tia a sawi hi a pawimawh em em. Sorkar hotute leh official-te'n theihtawp chhuah mah se, mipuiin an zir loh chuan a hlawhtling tak tak thei dawn lo; mipui an pawimawh tak zet.
Ṭhalai, mahni kutkea dinchhuah tumte'n Bana Kaih Scheme chhawr ṭangkai tumin inbuatsaih se, tih tak takna nen ṭan la se. Ṭanpuina dawnah duhtâwk mai loin, puihna an dawn ang taka hma an lak a, theihtawp an chhuah zui a ṭul ang. Sorkar aṭanga puihna dawnte hi a nihna tur takah hman tur a ni a, tihzûzî mai mai tur a ni lo.