Village Council leh Zoram politics

April 30, 2015-a village council inthlan tur atan district hrang hrangah inpuahchahna kalpui mek a ni a; Aizawl Municipal Council hnuaiah chuan local council a ni tawh thung ang.

V/C inthlana thu sawi awm ṭhin ngaihnawm em em mai chu, "V/C-ah chuan political party lam kan en lo a, a candi­date hi kan en chu a ni. Veng/ khaw chhung tana mi ṭha tur hi kan thlang mai," tih hi a ni. Veng/khaw tin deuhthawah politics-a ṭan lam neih avanga inbeihna a awm chung hian mipui nawlpuiin an party âwn lam ringawt an en lo a, an V/C member atan khawtlang tana mi ṭha tur an thlang mai ṭhin.

Mizoram ṭhanmawhbawk pakhat chu political party ruihchilhna hi a ni. MLA leh MP inthlanahte hi chuan party-in eng policy pawh kalpuiin eng ang candidate pawh thehchhuak se, kan party ṭan zawng an nih chuan vote loh theih lohah kan ngai ṭhin. Policy thar an kalpui tur chu kan duh loh zawng a nih pawhin kan party ṭan zawng a nih tawh laklawh avangin kan thlah thei lo a, candidate ṭha lo tak an dah pawhin vote ngei ngei turah kan ngai tlat ṭhin.

V/C inthlanah hi chuan mipui kan fingin ngaihtuahna kan seng a, can­didate-te hi an party aṭanga en loin an mimal nihna lam kan en a, veng/khaw tana ṭha tur chu an nihna kan dah pawimawh ṭhin. Hei hi MLA inthlan dawnah pawh lalut thiam ila, party policy leh candidate thlir chunga vote kan thlak hlan hi a nghahhlelhawm tawh hle a ni.