AMC leh bawlhhlawh paih lirthei

Aizawl Garbage Truck Owners’ Association, PPP Mode Bawlhhlawh Paih Welfare leh Sanitation Driver & Handyman Association-te chuan AMC-a an phûtte tihhlawhtlin a nih loh avangin vawiin September 23 aṭangin tlan an tum lo a, bawlhhlawh khawn an tum lo.

Aizawl Mayor erawh chuan bawlhhlawh paih lirthei enkawltute thil tih dan chu pawi a tih thu a tarlang thung a; local council hrang hrangte chu bawlhhlawh paih lirtheite tlàntir turin a chah.

Aizawl khawpuiah mihring nuai thum chuang daih an chênga a, chhungkua sing tél an awm. Aizawla chengte bawlhhlawh leh hnawmhnawk a tam em em a, ni khata bawlhhlawh paih a tam tham hle. Ni khat lek bawlhhlawh paih theih loha a awm pawhin mipuiin harsatna an tawh phah thei a, bawhhlawh paih lirtheite an tlân lo a nih chuan harsatna lian tak a thlen ngeiin a rinawm.

Aizawla bawlhhlawh paih lirthei neitute hian inngaihtuah nawn leh se a duhawm hle mai a, tuna hmalak an tum dan hi chu mipuiin an thláwp lo hle niin a lang. Mipui tan harsatna lian zawk a thlen loh nan bawlhhlawh khawn lo zawnga thuneitute kar an tumna hi sût leh thei se. Aizawl mipui, chhungkaw tin tana harsatna thlen lo zawngin, awmze nei tak sia thuneitute nawr dan a awm ngei ang.

AMC pawh an inenfiah a ngai viau; bawlhhlawh paih lirthei enkawltute phût, lungawi lohna an lantir chhan an sawi hi phût àwm tak a ni ve bawk.

Lirthei neitute chuan, lirthei hman man bitukah AMC-in tehkhawng leh behchhan mumal a nei lo a, veng hlat zawng an hriat dan angin motor hman man (rate) an bithliah mai niin an sawi a; a dik a nih chuan AMC-in rate an bithliah dan a felhlel niin a lang. Lirthei hman man tihsan ngawr ngawr an phût lo a, veng hlat zawng mila rate bithliah an phût niin an sawi a ni.

Lirthei hman man hi behchhan leh innghahna mumal tak neia bithliah a ni ṭhin a; lirthei azir te, a hlat zawng dik tak azirtein chhût a ni ṭhin; tehkhawngah kilometre biin rate bithliah a ni tlangpui. AMC pawh hian tehkhawng mumal tak an neih ngei a ṭul a ni.

Engpawhnise, AMC leh bawlhhlawh paih motor enkawltute hian mipuiin harsatna an tawh lohna tur zawnga hma an lak vat vat a ngai e.