Consumer-te chanvo humhalh

Champhaia chawhmeh bazarna hmunpui bera thil zuarte'n bûkna an hmante a dik leh dik loh thuneitute'n September 21, 2024 khan an endik a; sumdawngte'n bûkna dik lo an hman - non standard spring balance pakua leh beam scale pakhat an man.

Champhaia sumdawngte'n bûkna dik lo an hman eng emaw zat thuneitute'n an man hi a lawmawm a, thil leitute (consumer)-te tan a ṭha hle. Champhai DCSO-in a sawi angin, an hmalakna hi chhunzawm zel se, dawrkai dangahte pawh bûkna leh tehna dik lo hmang an la awm nual mai thei a; mipui nâwlpui hamṭhatna atan ṭan la sauh sauh teh se.

Mizoram hmun dangah, khawpui hrang hrangahte pawh bûkna leh tehna dik lo hmang an tam hlein a rinawm. Khawpui tinah consumer hamṭhatna tura hma latu thuneitute'n tun aia uar zawk leh chak zawkin hma la ṭheuh se; consumer-te'n an dikna leh chanvo an hmuha an chan ngei theih nan theihtawpa an bawhzui a ngai a ni.

Mi tam tak chuan thil dik lo tite thuneitute hnena thlen/hêk hi an inthlahrung ṭhin a, an peih lo ṭhin bawk. Mi dik lo leh thil dik lo tite thuneitute hnena hêk hi inthlahrun tur a ni lo a, tih ngei tur a ni zawk. Bûkna dik lo hmang emaw, kan dikna chanvo ei hêktu an awm emaw a nih chuan District Consumers Dispute Redressal Commision-ah leh thuneitu dangte hnena thlen nacháng kan hriat a ṭul.

Mizoram hi mi dik lote dinchanna ramah a chan kan phal tur a ni lo a, dikna lalna ram, mi dik lote chêpna ram a nih theih nan mi tinin ṭan kan lak tlân a pawimawh.

Mi tin hi thil leitu (consumer) kan ni vek mai. Consumer-te dikna leh chanvo humhalh tur hian sorkara thuneitute'n an hmazawnah theihtawp an chhuah a ngai. Mipuiin thil dik lote namnûl mai lo a, kan tih theih leh tih tur chinah taima taka hma kan lak a, dawhthei taka kan bawhzui a, thil dik lo kan do tlân a ngai a ni.