Black market-a petrol lei tur intlar

Tun hnaiah Mizoram châk lâk luhna kawng pui ber NH-06 chhiat avangin Mizoramah ni tin mamawh chi hrang hrang a lut ṭha lo a, chu'ng zinga langsar tak chu tuialhthei a ni. Tuialhthei a luh ṭhat loh avangin Mizoramah tuialhthei a váng.

Aizawl mai bakah, Mizoram hmun hrang hrangah tuialhthei a váng a, filling station (petrol pump) tam takin tuialhthei hralh tur an nei lo. Chutih laiin, filling station bul lawkah dan loa tuialhthei zuarte'n hralh tur an nei tlat thung a, a to em em bawk. To hle mah se mamawhna vangin mi tam takin an lei duh tho a, Aizawla black-a petrol zawrhna lâr tak pakhatah phei chuan petrol lei tur an intlar hial.

Petrol pump-ah tuialhthei hralh tur a awm loh laia a bul chiaha dan loa langsar taka tuialhthei zuarte aṭanga petrol lei tura intlar an awm hi thil thleng khát tak a ni a; Mizoramah dan a lal lohzia leh dan loa thil tite an zalenzia langsar taka tichiangtu a ni.

Dan loa tuialhthei zuarte hi sorkarin a lo vau tawh ṭhin a, mante pawh an awm tawh ṭhin. Thuneitute'n hma an lak lai leh a hnu hun rei lo te chhung chu an zuar lo ve mai a. Mahse, rei lo tê hnuah an zuar leh nghal a, thuneitu leh man theitute'n hmu reng mah se an ngaihven zui lêm chuang lo niin a lang.

Tuna sorkar mek hian sorkar hnathawk aikal lâk tihtawp a tum a, a titawp thawkhat tawh ni pawhin a lang. Department leh hmun ṭhenkhatah chuan aikal lak hi a ṭhat zawkna lai a awm ve a, aikal latu aia a aiawhtu sorkar tana a ṭangkai zawkna leh sorkar hna pawhin a ṭhat phah zawkna a awm. Mahse, danin a phal loh a nih miau avangin sorkarin tihtawp tumin hma a la a ni.

Black-a petrol leh diesel zawrh hi mi ṭhenkhat chuan mipui tan a ṭangkai, mipui harsatna sutkianna a ni an ti a; a dikna chen a awm. Mahse, ṭangkaina nei pawh ni se, danin a phal loh a nih miau avangin kan ram leh hnam kal zelna tur ngaihtuahin, tihtàwp theih ni se a ṭha zawkin a rinawm.

Dan loa thil ti ṭhinte kan en liam mai mai chhung chuan Mizoram hi dan lalna ram a ni ngai dawn lo. Kan ram hi dan lalna ram, dan loa thil tite chêpna ramah kan siam dawn a nih chuan sorkara thuneitute an taimâk a ngai a, thuneitute'n an tih tur an tih zat zat a ṭul a ni.