Inthlan dodala thil nawr

April 30, 2015-ah Mizoramah village council leh local council inthlanna neih tur a ni. Khaw ṭhenkhat chuan an khaw tana an thil ngiatte sorkarin a tihhlawhtlin loh avangin inthlana vote thlak loh an rel.

Inthlan dawn apiangin lung­awi loh avanga vote thlak loha sorkar kar/vau hi an awm ṭhin a, a tam zawk hi chuan vote thlak hi an ṭhulh hlen ngai tak tak lo a, vote thlak lo tlang ta pawh an awm ṭhin. Democracy hnuaiah kan cheng a, kan aiawh min enkawltu turte hi keimahni thlan vek an ni a, a thlangtu mipuite thlan tur hi tumahin an nawr lui thei lo a, vote thlak tura kal tura innawr luih chi pawh a ni lo.

Heti chung hian khua leh tui ṭhain a tih tur chu vote thlak ngei hi a ni a, lungawi lohna kan nei a nih pawhin inthlan ṭhulh zawnga tihlan loh hi a finthlak awm e. Kan chunga roreltu lamin kan duh anga thil an kalpui lo a nih chuan vote hmangin kan ngaihdan puangchhuak zawk ila a finthlak ang a, vote thlak loha thil kan kalpui hian kan thil phut kan hmuh phah lo kherin a rinawm lo a, vote thlak ngei hi a fuh zawkin a rinawm.

Kan lungawi lo a nih chuan lungawi lohna hi kan vote thlaknaah kan lantir thei a, tuna ro­reltu kan neihte thil tih dana kan lung­awi lohna pawh vote thlak hmanga chinfel tum hi a fuh zawk hmel. Chuti ni loa vote thlak loha kan ram ṭang dawn a nih chuan, kan lungawi loh chhan ber su kiang bawk si loin mahni aiawhte pawh thlang bawk si loin a awm theih dawn niin a lang.

Democracy hnuaiah kan awm a, kan chunga roreltute hi kan thlan tur an ni. Khua leh tui ṭha chu inthlanah a tel ngei tur a ni a, a ngaihdan puanchhuahna atan a vote hlu tak a hmang tur a ni zawk ang.