Hmasawnna leh a man

Aizawl Municipal Council (AMC) chairman chuan, Aizawl khawpui chhungah fly-over bridge hmun pathumah siam a nih dawn thu a sawi. Hetih lai hian AMC hotute chuan, an hmalakna hrang hrangah dodaltu an awm ṭhin avangin hna thawh chak a har ṭhin thu an sawi.

Hmasawnna hna thawh a nih dawn hian nghawng a nei ve ṭhin a, hma­sawnna lian thamah phei chuan nghawng a nei lian ṭhin hle. Kawngpui ṭha kan neih dawn chuan kawngpui laihna tur hmun neituten an tawrh a ngai a, kawlphetha tam tham pek chhuah dawn chuan dam siamna lamah a chhehvela mi chengten an tuar a, khawpuia building lian tham din dawn pawhin a bula chengte tan emaw chuan hnawksak a tling. Hetihlai hian hmasawn kan duh a nih si chuan a man kan pek a ngai a, a tuartu hi chu an awm lo thei lo.

Aizawl khawpui dinhmun kan hre tlang a, kawngpui a lian tawk lo a, kawng a tam tawk lo a, lirthei a pun chak si avangin traffic jam hi kan buaina lian ber pakhat a ni ta. He mi tihziaawm dan ngaihtuahtu lam hian harsatna an tawk zel a, ram/state danga huaisen taka an kal tlang hrawkna turah Mizoramah hi chuan tute emaw an vui/nawrh tlat chuan kan ṭhulh leh fo mai.

Tuna AMC-in fly over bridge siam a tum pawh hi sawiseltu leh dodaltu chu an awm leh ngei dawn tih a chiang a; nimahsela a chhawrtu tur mipui an ṭhathnem zawk avangin thuneitu lam tan ram tana ṭha ngaihtuah chunga huaisen taka thutlukna siam a ṭul ang. Hmasawn kan duh a nih chuan a man kan pek a ngai a, thil hi a thlawna neih vek theih a ni lo e.