Mi tihbuai ṭhin tihtawp thuai a ṭul

September 21, 2024 zanah Durtlang Leitan huam chhungah mi parukin doctor pahnih leh mi dang pakhat an khawih rawn a, sawisak zinga pakhat phei chu a hliam na deuha sawi a ni a; a zialo tak zet. Mi sawisak rawn ang chi hi tun hnaiah sawi tur a awm zauh zauh.

Mi kutthlak rawn te, inphêksual ang chite hi a changkang lo em em a, hnam changkang lo leh la mâwl takte tih àwm tâwk a ni. Mizote pawh kan changkan hma, tun hma chuan khua/veng dang mite tihbuai chíng kan lo ni tawh ṭhin a; mahse, a changkan loh êm avang leh Mizote kan changkân ve tial tial avangin kan kalsan tawh.

Kan kalsan tâk - mi kutthlak rawn, mi tihbuai leh inphêksual ang chite tun hnaia chíng an awm leh ṭhin hi a zialo a, tihtawp vat tura hmalak a ṭul. Titawp turin engtia tih nge ṭha ber ang tih hriat a har mai thei a; sorkar, kohhran, pawlte leh mipui kan ṭan tlân a ngai ang.

Police hmanga khawpui chhung vil uluk lehzual a ṭulin a rinawm a, sorkar hmalakna tur chi a ni. Khawpui chhunga ruihtheihthil ti ṭhinte awm tamna leh interekna hmunte vil ṭhatin awmzia a nei viau mai thei.

Mi tihbuai chíng zinga a tam zawk chu tleirawl deuh, la upa vak lote an niin a lang a, inzirtirna lam uar a ṭangkaiin a rinawm. Tleirawl aṭanga inzirtir ṭhat a ngai a, kohhranin tih theih an nei. Sunday school-a senior department leh tleirawl inkhawmahte inzirtir tam a ṭangkai hlein a rinawm bawk. Sikul leh college-ahte pawh zirtirtute'n an zirlaite an zirtir thei ang a; nu leh pate'n kan fate kan zirtira kan thunun ṭhat a ṭul bawk.

Khawtlang himna atana pawimawh em em mai chu YMA-te an ni a, khawtlang mipuiin kan thlamuanpuite an ni. YMA branch hrang hrangte'n an huam chhung ṭheuh vil uluk lehzual se, an huam chhungah mi tute'n emaw zu an in ṭhinna leh ruihhlo an tih ṭhinna hmun a awm a nih chuan, an tih tawh loh nan hma la thei se. CYMA aṭanga hmalakna kal mek, tleirawlte zana chhuakvâk tam lutuk tireh tura hmalakna pawh bawhzui ṭhat a ṭha àwm e.

Khawpui a ni emaw, thingtlang a ni emaw, khawlaia himna a pawimawh a, khawlai him lohna hmun hi khaw nuam a ni ngai lo. Aizawl khawpui leh khaw dangte himna turin sorkar, kohhran, pawlte leh mi tinin kan theihna zâwn ṭheuhah ṭan kan lak ṭul a ni.