Kawngpui - hmingṭhatna leh mualphona

Tun hnaiah state sorkar hmalaknain Kawnpui leh Khamrang inkar bika kawngpui chhe zual laite thawm ṭhat a ni a, hun eng emaw chen thawm ṭhat hna thawh a nih hnuah Mizoram mamawh chi hrang hrang phur lirtheite chu Aizawl leh hmun dang pan tura kaltir a ni.

Lirthei tlân hleih theih loh khawpa kawngpui chhe laite thawm ṭhat ni mah se, NH-06 Vairengte-Sairang kawngpui hmun tam takah a la chhe hle. A bikin Bualpui (Seṭhawn) leh Kawnpui inkar leh Kawnpui leh Khamrang inkarah chhe tak tak, lirthei tana tlân harsa khawpa chhia a la tam. Hengte hi kawng chhe zual lai a ni mai a, sawi lan loah pawh kawng a ṭha lo tlangpui.

Kolasib district hi Mizoram kawtchhuah district a ni a, chumi chhunga NH kawngpui pawh Mizoram mamawh tinrêng lak luhna, Mizoram kilkhâwr bera chengte tan pawha pawimawh a ni. Chuvangin, kawngpui dang zawng aiin a pawimawhna chen a awm a, enkawl uluk bik pawh a ṭha hial ang.

Kolasib district chhunga NH kawngpui chhe zual, lirthei tlân harsa khawpa chhia hmun eng emaw zata la awmte hi thawm ṭhat thuai a nih loh chuan, lirthei tlân theih loh khawpa a chhiat leh a hlauhawm a, sorkarin thâ thlah loa a thawm ṭhat vat vat a ṭul.

Kawngpui ṭha leh ṭha lo hi sorkar hmel lanna a ni. Kawngpui hi a langsar a, sorkar chêt ṭhatna leh chêt chhiatna mipuiin awlsam taka an hmuh theih a ni a, hmingṭhat theihna leh mualpho theihna a ni; mipuiin sorkar an tehna pawimawh tak a ni bawk.

Sorkar thuneitute hian sorkar an kaihhruai dan leh ram an enkawl danah mipui rilru rilru hneh an duh a nih chuan kawngpuite an vil uluk a ngai a, lirthei tana tlân nuam taka an enkawl a ṭul a, ṭang sauh sauh zel rawh se.