Hnathawktute ṭang zel se

Tun hnaiah ruahsur leh thlipui avangin Mizoram hmun hrang hranga kawlphetha pek chhuahna a chhe nasa a, Aizawl leh a chhehvel thlipuiin a nuai vangin electric hrui chat a tam. Heng hrui chhiate hi a rang thei angin Power & Electricity Department-a thawktute'n an siam ṭha a, siam hmabak pawh eng emaw zat a la awm.

Mizote hi infak leh inchawimawi hreh tak kan niin a lang a, tute emaw hnathawh ṭhat sawi pawhin, "An tih ve tur reng a ni," kan ti leh mai ṭhin. P&E thawktuten ruahsur hnuaia thawka electric hrui chat an siam nghal hi an tih ve tur reng a ni mai thei a; nimahsela an tih tur an tih danah fak an phu hle a ni.

Hetihlai hian a tuartu mipui lam tan chuan hun rei lo te chhung thim pawh thil hrehawm tak a ni a, ni khat aia rei thim phei chuan harsatna lian tak a thlen. Mi tam tak eizawnna a nghawng a, nitin khawsak phung a tibuai tawh a, chuvangin electric hrui chhia hi chu a rang thei ang bera an buaipui nghal hi a ṭul reng a ni.

Tun hnaia electric hrui chhia an siam dana fak hlawh tak P&E hnathawktute hian fak an hlawh chhunzawm zel theih­na turin ṭan la se; Mizoram khaw­pui berah lo pawh electric hrui chhia a awm a nih chuan a rang thei ang bera siam tumin ṭan la rawh se.

Tunah pawh electric hrui chhiate hi siam ṭhat zawh a la ni lo a, mipuite tawrhna hre rengin theihtawp chhuah chhunzawm zel rawh se. Mipuiin hnathawk ṭha an hai lo a, P&E lam hnathawh danin fak a hlawh rual hian, faktlak an nih chhunzawm zel theihna tur chu anmahni kutah a awm a, taima takin bei zel rawh se.