Lirthei chuan/hman man bithliah
Lunglei District Transport Officer chuan Lunglei district-a mihring phur sumdawnna lirthei neitute chu State Transport Authority-in rate a siam aia sanga chuan man (fare) tisang lo turin a hriattir a, sorkarin rate a bithliah aia sanga tlante chungah action lak a nih tur thu a tarlang.
DTO hmalakna hi a ṭha hle. Lirthei neitute tan chuan a lawmawm loh ang a, mipui náwlpui tan erawh chuan lawmawm leh ṭha tak a ni ngei ang. District danga DTO-te pawhin a ṭul angin hma la ve se, sorkarin rate a bithliah mek anga sumdawnna lirtheite an tlân theih nan khawng takin hma la se.
Lungleia maxicab neitute'n Lunglei-Aizawl chuan man Rs 600 aṭangin Rs 700-ah an tisang nia sawi a ni a, a sânna hi 16.67% a ni. Rate an tihsan chhan, tuialhthei man tihsana a sanna erawh 5% vel a ni. Tuialhthei man 5% vela a san laia lirthei chuan man 16% aia tama tihsan hi a àwm lo viauah a ngaih theih.
Lunglei DTO hmalakna avang hian lirthei neitute lam an lungawi lo ngei ang a, lungawi lohna pawh an lantir duh mai thei. Chutiang karah chuan sorkar thuneitute an dinnaah khawng tak leh huaisen takin ding rawh se.
Sumdawnna lirthei chuan man leh hman man hi lirthei neitute bithliah tur a ni lo a, sorkar bithliah tur a ni. Sorkar thu ngaichâng miah lo leh thupek bawhchhiaa mahni duh ang anga rate bithliah hi thil tih dan tur a ni lo. Chhan ṭha tak avanga rate tihsan an duh a nih pawhin sorkara a khawihtute hnenah thlen tur a ni a, a ṭul angin sorkar lamin an lo ngaihtuah tur a ni. Chutianga sorkara thlen hmasak pawh awm loa mahni duh duh dana rate bithliah ve tawp hi chu thil dik lo leh ṭha lo a ni a, mipui duhsakna a ni lo a, mahni hmasialna a ni.
Lirthei chuan man leh hman man ding mek chungchangah lungawi lohna emaw, tihsan duhna emaw a awm a nih chuan mumal takin rate bithliahtu sorkara thuneitute hnenah thlen ni se, a ṭul angin sorkara thuneitute pawhin an ngaihtuah mai ang a. Chhan ṭha tak a awm a, rate tihsan a ngai nih chuan lirthei neitute hlâwkna tur ni si, mipui náwlpui tana rit lutuk lo leh ban phâk tur sia bithliah a ṭha e.