Thu dik lo thehdarh

Association for Voluntary Blood Donation, Mizoram chuan tun hnai khan press release an siam a, college pakhatin blood donation camp an neiha thisen an pek zinga 60% chu HIV positive a nih thu thehdarh chu thu dik lo hulhual a nih thu leh, thu dik lo thehdarh a ni chu pawi an tih thu an tarlang a; thisen petute tihnual thei tuh dik lo thehdarh tawh lo turin mi tin an ngen bawk.

Mizote hi thisen pekah kan ṭhangharh tawh hle a, ṭhalai tam tak chuan hunbi neiin mumal takin thisen an pe ṭhin a, kum khat chhunga ṭum 3/4 lai thisen pe ṭhin mi ṭhahnem tak an awm tawh. Chutianga ni pha chiah lo, pawl hminga thisen pek huaihawta thisen pe zat zat ṭhin mi tam tak an awm bawk.

Hre zawkte sawi danin, thisen pek zawng zawng hi a thianghlim leh thianghlim loh te, natna hrik a awm leh awm lohte endik vek a ni a; natna hrik, a bikin HIV leh Hepatitis kai rinhlelhawmte chu mi hnenah pek a ni ngai lo. HIV kai rinhlelhawm tlemtê tak tak a awm ve tawh ṭhina sawi a ni a, chutiang a nih pawhin, a hre tur takte bâkin an hre ngai lo a, mipui vantlang tan hriat theih a ni lo a ni.

Chutiang a nih laia college pakhatin thisen an pek zinga a tam zawk, 60% vel lai HIV positive an awm anga thu thehdarh hi a àwm ang lo em em a, mi pangngai tan âwih chi a ni lo. Chutih rualin, thisen petute leh a tuartu tan chuan rilru leh ngaihtuahna tibuai thei tak a ni thei a, mahni inrilhlelhna piantir theitu a ni thei bawk.

Miin tlawmngaih chhuaha mite nunna chhanna atan ṭhahnemngai taka thisen an pek laia an rilru tihnual thei zawng leh an rilru tibuai thei zawnga thu dik lo thehdarh a ni hi a zialo tak zet. Inîtsikna rilru aṭanga chhuak leh intihhmingchhiat tumna vang a ni thei a; chìn chhunzawm loh tawp chi a ni.

Social media kan hmang nasa tawh a, mi tin mai hi thu thehdarhtu kan ni tawh. Kan fimkhur em em reng a ngai a, ho tê anga kan ngaih hi mi rilru natna thlentu a ni thei a, mahni intihmualphona leh thubuai rip tak neih theihna, buainaa intah luhna a ni thei. Social media-a thil kan thehdarhte hi keimahni min tichhetu, buainaa min hnûk luttu a ni thei tih i hria ang u. Kan fimkhur zual deuh deuh a ṭul tak zet a ni.