Hmingchhiatah tawp lo se

Agriculture minister R Lal­zirliana chuan, tun hmaa thlai chi supply vanga Agriculture department hmingchhiatna thleng ṭhin ang chu thleng nawn tawh lo se a duh thu sawiin, "Kuthnathawktute hnenah thlai chi kan sem a nih chuan a ṭha ber a ni tur a ni," a ti.

Mizorama kan kalphung ṭha lo tak chu thil dik lo a awm tih chiang rengah pawh 'hmingchhiat' hi hremna angah kan ngai ta emaw tih mai tur hi a ni a, tute emaw hming a chhiat chuan chu chu a tawrhna anga ngaih mai a ni ṭhin. Miin thil a tisual a, a tihsual hailan a nihin a hmingchhia a; nimahsela hrem a nih zui loh chuan a fel lo hle a ni.

Tuna thil kal danah hi chuan intihhmingchhiat, tih dik lohna hailan leh eiruk puanzarsakte hi siam ṭhat hna kan thawhna kawnga a tawpna ang maiah kan ngai ṭhin. Dikna kan duh tak tak a nih chuan an tihdik loh avanga hmingchhe taka awmte hian dan hmaah thiam loh chang ngei se, hremna thleng raka kalpui a nih loh chuan 'hmingchhiat' tihte hi inremna a ni tak tak ṭhin lo.

Minister sawi ang hian tun hma deuh aṭang tawhin Agriculture department chhung­ah hian thlai chi supply mai bakah loneitute tana khawl supply thlengin thil fel lo a awm ṭhin niin a lang a, 'hmingchhiatna' hi chu a awm ngei ṭhin. Heng hming­chhiatnaa mawh­phurtute hi hrem loha an chhuak zel a nih chuan 'hmingchhiat' ringawt hi chu kan ngaimawh lo sawt hle niin a lang a, hmingchhiata tawp loa hremna thlenpui zel theih ni se a ṭha khawp mai.