Hri leng thei laka inven

Tun hnaia hmun hrang hranga ar pûl hri chi khat, Avian Influenza (bird flu) lêng mek a, state ṭhenawm Manipur-ah he hri hi a thlen avangin Mizoram a thlen palha inralrin dan tur AH&Vety department hotute'n an ngaihtuah. Bird flu hi mihring tana natna hlauhawm tak thlen thei hri a ni.

Khawvel sorkar thiltithei leh hausa pawhin an dan hleihtheih loh chu hri leng tur hi a ni a; nimahsela ram changkangah chuan hri a len pawha lo hmachhawn dan tur ṭha zawk inbuat­saihna an nei a, ram rethei leh hnufual zawkte aiin hri thuhmun lennaah pawh an tawrhna a nêp zawk ṭhin.

Hri leng tur hi lo sawi lawk theih pawh a ni chiah lo a, khawi chinah nge a lên dawna khawi chinah nge a tawp dawn tih pawh sawi theih a ni lo. Hei vang hian insawiṭhaih leh mipuite tichiai zawnga thuchhuah leh puan darh hi a him lo a; mipuite hnena hri a len palh pawha inven dan hrilh hriat mai hi a tawk hle a ni.

Hri leng thei tur hi inven lawk tak tak harsa mah se, inven lawk theih chin leh inbuatsaih lawk dan erawh a awm. AH&Vety de­partment-in inven lawk dan ruahmanna a siam hi a lawmawm a, hei hian bird flu lakah hian Mizoram hi a zavaiin a veng dawn tihna ni hauh lo mah se, inbuatsaihna lo neih lawk hi a finthlakin a ṭha hle a ni.