Insawiṭhaih

April 25, 2015-ah Nepal ramah lirnghing na tak a thleng a, mi 2,000 dawnin nunna an chân a, hliam tam tak an awm. In tam tak a chhia a, kawngpui a khi chat a, inbiakpawhna a chhe tel a, khawvel ram hrang hrangin an ṭanpui nghal bawk. India ram hmun ṭhgenkhatah pawh lir hi a nghing a, nunna chân pawh eng emawzat an awm.

Nepal-a lirnghing hian India ram chhung hmun ṭhen­khat a nghawng avang pawh a ni thei a, Mizoramah a darh chak hle. Tunlaiah inbiakpawh a awl­sam tawh a, mobile phone kaltlangin facebook, whatsapp, SMS leh kawng dangin thil a thehdarh zung zung theih tawh a, hei vang pawh hi a ni ang, Nepal lirnghing hian Mizoram a fan hneh hle a ni.

He thil a thlen hnu lawk hian Mizote zingah insawiṭhaihna lam thehdarh a tam hle mai a, Mizo ṭawnga inziak thu mak tak tak hmuh tur a awm. Lir a nghin leh tur thute leh Mizoram ngei pawh a nghawng tur thute thlenga thehdarh pawl an awm a, a awih tawk an awm zel bawk.

Hetianga thu belhchian dawl lo, mipui tichiai thei thehdarh hi a pawi takzet a, mi tam tak thlabarin a siam a ni. Hmun pakhata chhiatna a thlen avanga inralring tura inzirtir hi chu thil ṭha tak a ni ang a; nimahsela insawiṭhaih zawnga tih vak mai hi chu sim a hun tawh hle a ni. Mithiamte pawhin lirnghing tur hi an sawi lawk thei lo a, a hun leh hmun hi hriat theih a ni ngai lo, chutihlaia Mizorama lirnghin tur thu thehdarh a ni hi mi tam tak tihbuaina mai a ni a, a pawi hle a ni.

Pathian thuah a ni emaw, khawvel thil thlengah pawh insawiṭhaih chin hi thil ṭha lo tak a ni. Inralring tura inzirtir leh inbuatsaih lawk tura inhrilh hi chu thil dang daih a ni a, insawiṭhaih zawnga thu thehdarh hi Mizote hian i sim ang u.