Ruihhlo donaah khawtlang leh kohhran

Home Minister chuan September 28, 2024-a Khawzawl SP pisa a tlawhnaah, ruihhloin Mizo ṭhalaite nun nasa taka a tihchhiat avangin thapui thawha ruihhlo do a ngaih thu a sawi. September 28 vêk khan YMA, Tuivamit Branch chuan zing karah an vengah 'Ruihhlo do kawngzawh' an huaihawt.

Sorkar mi leh sate chakna leh theihna hmang ringawt chuan ruihhlo do hneh theih a ni lo a, tlawmngai pawlte, kohhrante leh mipui náwlpuite nen ṭangruala do a ngaih thu hi Home Minister chauh ni lo, sorkar hotu dangte leh mi hrang hrangin an lo sawi tawh ṭhin a; thu dik a ni.

Tuivamit Branch YMA-in ruihhlo dona kawngzawh an huaihawt hi a lawmawm a, YMA branch dangte pawhin an remchang anga an tih ve atan thil ṭha leh ruihhlo donaa ṭangkai tak a nih a rinawm.

Tunlaiin ruihhlo, a bik takin heroin (no. 4) a hluarzia kan hria; ruihhlo ti ṭhinte pawh an inthup lo tial tial a, langsar takin an che vel ngam tulh tulh niin a lang. Hetiang zela Mizoram leh Mizo ṭhalaite hi kan kal chho a nih chuan, kan ram hma lam hun hi a êng lo viau thei a; tun aṭangin mi tinin mahni tih theih tâwkah ṭan kan lâk a ṭul a ni.

Ruihhlo ti ṭhin zingah awm ngheh deuhna khua/veng nei lo awm theih a nih rualin, a tam ber chu khua/veng nei an nih a rinawm a; an dinhmun mai bakah, an chhungkaw dinhmun thlenga hre chiang bertu chu an awmna khua/veng khawtlang hruaitute an ni ang.

Khawtlang, kohhran leh kohhran hnuaia ṭhalai pawl hruaitute hi an khua/veng chhung hre chiangtu an ni a; ruihhlo ti leh ti lote pawh hre chiangtu an ni. Hetiang a nih avang hian ruihhlo donaah a thawh hlâwk thei ber turte zinga mi an nih a rinawm.

Khua leh veng tina khawtlang hruaitute (VC/LC, YMA/YLA/MTP) leh kohhrante hi ṭang tlangin, an huam chhunga ruihhlo tite chhinchhiah se, a ṭul angin hma la se a ṭha viau ang em? Ruihhlo bâwiha táng tawhte chhan chhuak tur leh ruihhlo ti ṭan tìr deuhte leh, tih ve mai hlauhthawnawma ngaih (high risk)-te ruihhlo laka véng turin a ṭul angin bawhzui thei se, ruihhlo dona atan leh ruihhlo laka kan ram leh ṭhalaite chhan chhuah nan a ṭha viau lo'ng maw?