Myanmar vawkte lakluh

AH & Vety department hotuten zawhna chhanga an sawi danin, Myanmar aṭanga vawk lakluh chu sorkar hotute thutlukna a ni a, an lakluhna kawngah dan ang takin thil an kalpui lo a, India leh Myanmar insumdawn tawnna item-ah ran hi a tel lo.

Myanmar aṭangin vawk ṭhahnem tham tak lakluh a ni a, heng vawkte hi tunlaia Mizorama vawk hri PRRS tidarhtu nia rin a ni a, a finfiahna awm lo mah se Myanmar ramri hnaih lamah vawk an thi nasa hle. Myanmar vawk lakluh hrim hrim hi thil ṭha lo a ni lo a, kan mamawh a, a vawk a ṭhat bawk a, lakluh tur a awm bawk chuan dan ang diak diaka kalpui ni lo mah se a la pawm theih a; nimahsela PRRS lenna ram a nih vangin vawkte lakluh an enfiah vek lo hi chu thil fel lo tak a ni.

Kumin chhungin Mizoramah vawi 3,500 chuang an thi tawh a, heng zinga 2,500 vel hi Champhai district chhunga mi an ni. Hetia mawl taka chhut pawh hian Champhai hi Myanmar hnaiha awm a nih vangin PRRS hi Myanmar aṭanga lo lut a ni ang tih rinhlelhna hi a sang a, lo ni lo tehreng pawh ni se PRRS lenna ram Myanmar aṭanga vawkte lakluh an en fel vek lo hi chu sorkar thiam loh a ni.

Hemi piah lamah hian NLUP hnuaia vawkte sem tur ruahmanna hi tlachawp leh chawp-chilh taka rel a ni lo a, chuvangin ma-mawhna a san avanga Champhai leh a chhehvel aṭanga hmanhmawh taka vawkte an lalut anga sawi hi chu pawm a harsa khawp mai.

Tun hnaia Myanmar aṭanga vawkte lakluh avanga PRRS thleng ta nia rinhlelhna awm hi a finfiahna awm chiah lo mah se, thil kalphung thlir hian sorkarin Myanmar aṭanga vawkte a lakluh danah hi chuan thil fuh tawk lo chu a awm niin a lang.