CM ânna kha

Chief Minister Lal Than­hawla chuan, 14th Finance Commission report chu lawmna tur a awm loh thu a sawi a, Mizoram leh special category state dangte hrekna mai a nih thu a sawi.

State pakhat chief minister meuhin 14th Finance Commi­ssion ruahmanna ṭha a tih loh thu a au chhuahpui ta chiam mai hian 14th Finance Commission hi zir chian chakna a hring lo thei lo a, mi thiamte hian he 14th Finance Commission hi eng nge a nih chiah a, eng angin nge kan hlawkpui dawn a, eng anga chhiatpui theih nge kan nih tihte pawh hriat vek a ṭha hle mai.

Chief minister a ni a, kan harsatna tawh theihte pawh hmu thiam tura ngaih a ni a, heti taka a âng chhuak hian kan state tana ṭha lo tur a hmu thiam ni ngei tur a ni. Chutihlaiin eng anga ruahmanna fuh lo pawh lo awm ta tehreng se, heti chiama a ân chhuah hma hian a zirchianna lamte pawh hi buatsaihin emaw, mithiamte ngaihdante pawh mipui hian hre hmasa se a ṭha khawp mai.

Mipui nawlpuiin an hriat hmasak ber chu chief minister-in 14th Finance Commission ṭhat lohna a sawi thu leh inhrekna ang hial nia a hriat thu hi a ni. Hei hi a dik a nih pawhin mipuiin Finance Commission an hmelhriat dan tur hi chu a fuh lo thei dawn hle a ni.

Tunah chuan engkim ruahman sa a ni tawh a, kan duh emaw duh lo emaw 14th Finance Commission rua­hmanna anga kan kal a ngai dawn a nih hmel. A ṭhat lohna leh fuh lohna lam a awm a nih pawhin, hemi hmachhawn tura inpuah-chah a, 14th Finance Commission rawtna hnuaia a ṭha thei ang bera kal dan tur ngaihtuah ni ta zawk se a ṭha awm e.