Ration card siamṭhat ṭulzia a lang

National Food Security Act-in a huam ve loh, ration card vár neite tana buhfai khul man chu nimin, October 1 aṭang khan Mizoram sorkar ruahman angin kg khat zelah Rs 30-ah tihsan a ni ta a; ration card eng leh pâwl neite buhfai lak man erawh tihpun a ni lo.

Mizoram sorkara Food, Civil Supplies & Consumer Affairs department chuan ration card siamṭhat tumin hma a la mek. Hmalak tawh chinah Aizawl leh Lungleiah mitthi tawh, ration card-a la awm si 2,316 hmuh chhuah a ni tawh a, ration card nei si, thla ruk chhunga ration buhfai la ngai lo chhungkaw 6,500 vel hmuh chhuah tawh a ni.

Aizawl leh Lunglei khawpuiah ringawt mitthi tawh, ration card-a la awm si 2,316 hmuh chhuah a ni leh Aizawlah ration buhfai la ngai lo chhungkua 6,500 vel hmuh chhuah a ni tawh hiabn ration card siamṭhat a ngaihzia a tichiang. Hmuh chhuah tawh zat hi khawpui pahnih chhunga veng leh chhung zawng zawng a la ni lo a, report lut tawh chin chauh a ni nghe nghe.

Mizorama ration card nei zinga chhungkaw tam tak, a bik takin khawpuia khawsa thei zawk tam tak ration buhfai an la ngai lo a, sumdawnna dawra aṭanga buhfai ṭha zawk an lei an ei an duh zawk; chu chu ration card ennawn mekah a rawn lang chhuak a ni.

Ration card siamṭhat a ṭulzia a lang chiang a, sorkar pawhin siamṭhat tumin hma a la mek. Sorkarin ration card siamṭhat a tum hi ram leh hnam pumpui tana ṭha tur niin a lang a, political party inbeihna atan hmang an lo awm a nih pawhin sorkar hi huaisen takin kal se, hma la zui zel rawh se. Chutih rualin, party leh mimal tute emaw hamṭhatna tur erawh chu ni lo se.

Ration card siamṭhatna turin khua leh vengah NFSA committee din a ni. Anni hi ration card siamṭhatna tura a bulṭhut an ni a, anni tel lo chuan sorkar a che tak tak thei lo; an pawimawh tak zet. An pawimawhzia inhria se, political party-a awmna dahṭhain, Mizoramin ration card dik tak a neih theih nan, ram leh mipui tana ṭha turah dik taka an kal ngam a ngai e.