Fai turin i ṭang zel ang u

Chawlhkar hnih kal ta, September 17 aṭanga October 2 chhung khan Mizoramah faina beihpui thlâkna Swachhata Hi Seva Campaign leh Mizoram Cleanliness Week hman a ni a, a tàwp ní, October 2 hian a khârna hun hman a ni. October 2 hi 'Faina Ni' (Swachhata Diwas) tih a ni bawk.

Faina beihpui thlâk chhungin chi hrang hrangin hmalak a ni a, hmun hrang hrangah faina hnatlang huaihawt a nih bakah, mipui thinlungah fai duh tak takna tuhna atan intihsiaknate leh thil entirnate buatsaih a ni. Mizoram leh a chhunga cheng mipuite faina atana sorkar hmalakna leh a bawhzuitute zawng zawng ṭhahnemngaihna leh thawhrimna a fakawm.

Ram leh khaw fai kan nih theihna tura hmalakna hian mipuiteah awmzia a neih ngei beisei ila, hma kan sawn ve ngei ang. Beihpui thlâk hun bik tàwp mah se, sorkar, khawtlang, pawl leh mi tinin fai tura ṭan kan lak zui sauh sauh a ṭul a, inthlahdah zui chi a ni lo.

India rama state dang leh khawpui dang tam takte ngaihtuah chuan Mizoram leh kan khawpui ber Aizawl hi en mai chuan a fai zawkin a lang. Chutih rualin, hmasawnna tur tam tak kan la nei a, a bik takin bawlhhlawh paih danah hmasawnna tur kan la ngah hle.

Bawlhhlawh a báwma paih zel leh ṭawih thei leh ṭawih thei lo thliar hi a bik takin khawpuiah chuan chìn dan nghet (habit)-ah kan neih a ṭul tawh tak zet. Kan in bul maiah bawlhhlawh paihna remchang tak a awm a nih pawhin bawlhhlawh báwmah chauh paih zel hi keimahni leh kan ram tana ṭha tur a ni tih kan chian em em a ngai.

Kan inchei dan te, kan thawmhnaw te, in chhung kan chei dante a changkâng viau tawh; chumi mil chuan bawlhhlawh paih danah pawh kan changkân tel ve a ngai. Lirthei changkâng tak tak aṭanga khawlaia bawlhhlawh paih chhuak hmuh tur a la tam, i bànsan tawh ang u. Kan lirthei leh kan incheina changkân dan milin kan bawlhhlawh paih dan kan tihchangkàn a hun hle tawh a ni.