Thisen peka ti ṭha chawimawina

National Voluntary Blood Donation Day - October 1, 2024 khan Mizoram chuan Ministry of Health & Family Welfare leh National Blood Transfusion Council aṭangin India hmarchhak state zinga a thlawna thisen pe tam ber chawimawina (award) a dawng. Award hi Jaipur, Rajasthan-a buatsaih India Blood Donation NGO Conclave-ah inhlan a ni.

Mizoramin India hmarchhak state zinga voluntary blood donation-a ti ṭha ber award a dawng hi a lawmawm hle mai a; thisen pek lama thawktu te, thisen pek a ṭulzia tlangaupui ṭhintu te, thisen petute zawng zawng ṭhahnemngaih rah chhuah, Mizo mipui, a bikin ṭhalaite tlawmngaihna vang a ni ngei ang.

Thisen pek hi thil ṭha, mite damna thlen theitu nihna a ni a, thisen pek lama ti ṭha chawimawina dawn pawh hmingṭhatna a ni a, a chhe lama lansarh a awl em em kara hetianga a ṭha lama Mizoram kan lang leh ṭhin hi a ropui.

Mizote hi thisen pek kawngah kan harh tawh viau a, Mizo ṭhalai, mi hrisel pangngai chuan thisen pek nacháng an hre deuh vek tawh a; a lawmawm. Hrisel tak chunga thisen pek nacháng hre lo chu mi tlemtê chauh an ni tawh awm e.

Thisen pek ṭhatzia leh hlutzia te, mi nunna chhanna a nih dan te, mi ṭanpui dan rau rauah a hlut bikziate hi ṭhalaite'n hre thar zel se, thisen pek uar sauh sauh zel se. Ṭan kan lak zel chuan hmarchhak bial mai ni lo, India ram puma voluntary blood donation-a sang ber kan la nih theih ngei ang.

Thisen pekah Mizote kan harh viau tawh rual hian, thisen pekna hmun blood bank-te pawh thuam ṭhata tihchangtlun zel a ngai. Thawktu leh hmanrua neih tam tâwk loh vanga thisen pe duh mimal leh páwl hrang hrangte dâwl zawh loh pawh thil awm palh thei a ni a, chutiang a awm loh nan sorkarin ṭan a lak ve zel a ṭul.

Blood bank-a thawktute zawng zawng an inhawn lehzual a ngai a, dàwr nuam leh biak nuam an nih a ṭul. Thisen petute hi mahni insengso leh insáwr chhuaka mi tana inpe an ni a, túm deuh bár chunga lo dawnsawn a rem lo a, hmél hlim taka lo chhawn theih zel a pawimawh a ni.