Assam private car-te enfiah a ṭul

Mizoram Commercial Vehicles Union (MCVU) chuan October 1-3, 2024 chhung khan Bualpuiah hrui pawtin check point an siam a, Assam registration nei mimal lirthei (car) lut leh chhuakte'n khualzin (passenger) an phurh leh phurh loh an endik ṭhin; hei hi sorkara thuneitute hriatpuinaa tih niin a lang.

MCVU hian ni thum chhunga private car 109 an endik zingah dan loa passenger phur eng emaw zat an hmu a, dan kalh a nih avangin ti tawh lo turin an hrilh a, harsatna dang siam loin an kaltir leh mai tlangpui.

Sumdawnna atana lirtheite hi dan hnuaiah mumal taka chhinchhiah a ni a, sumdawnna atana hman ni lo mimal lirtheite'n an chawi ve loh chhiahte an chawi ṭhin. Chhiah chawi si loa sumdawnna atana lirthei hman hi dan kalh a ni.

Hun eng emaw ti aṭang khan Assam registration lirthei (car) Mizorama lut leh chhuak zingah mihring chuan khah tlatna te, bungrua eng eng emaw phurte Vairengte leh Aizawl inkar kawngpuiah hmuh tur a tam a; dan loa thil ti leh tlân ṭhin nia an lan avangin mi tam takin an ngaimawh tawh.

Assam registration lirthei, mihring leh bungrua phur ṭhinte MCVU-te'n ṭhahnemngaia an lo enfiah te, dan loa tlante an lo hmu chhuak leh ti tawh lo tura an lo hriattir hi ram tan thil ṭha tak a ni. Hun kal zelah an la endik a ṭul hun a la awm leh a nih pawhin dan hnuaiah dik takin ti zel thei se a ṭha ang.

Phalna nei loa state ramri kân/paltlanga passenger phur Assam lam lirthei tlân ṭhin hi a ngaimawhawm a, enliam mai chi a ni lo a, sorkar hmalak zuina chi a ni. Dan loa tlân ṭhinte an tlan tawh lo nan sorkar hian hma a la tur a ni a; páwl hman ṭangkai thiam a ṭhat rualin, páwl kuta innghat ringawt loin, sorkarin a bawhzui tur a ni a, dan loa thil tite lakah hma a la tur a ni.

Assam lam mimal lirthei Mizorama rawn lut ṭhinah ruihhlo tawlh an awma rinhlelh a ni bawk a; hei vang hian ngaihthah chi a ni lo a, sorkarin a ngaihven a, ngun lehzuala endik a ṭul ang.