All India service leh Mizote

Department of Personnel & Administrative Reforms Minister chuan October 4, 2024-a Aijal Club-a 'All India Services Seperate Cadre for Mizoram' (Mizoram tana cadre hran neih) chungchang zirhona a hmanpuinaah, Mizoram sorkar inrêlbàwlnaa a fawng pawimawh leh sang tak tak chelh turin Mizo an awm meuh tawh loh thu a sawi.

DPAR Minister hian a kum tèlin Mizoram sorkara officer post lian te, district DC leh SP-te Mizoram páwn lam mi, hnam dangte'n an luah tam tial tial thu a sawi bakah, Mizoram ṭhalaite'n all India civil service-a tling turin rualawhna tak tak rilru an put a, rim taka an zir a ngaih thu a sawi bawk. DPAR Minister thusawi hi Mizo ṭhalaite'n chonaah ngai thei se a duhawm hle mai.

Tuna Mizoram Chief Secretary hi a chhuak dawn hnai a, amah thlâka CS ni thei tur Mizoramin mi leh sa kan nei lo a, hnam dang CS kan nei leh dawn a ni mai thei. IAS kan neih tlem tawh êm avangin Mizoramin IAS post a neih eng emaw zatah state service mite an awm mek. IPS (direct) phei chu kum 1995 hnuah Mizoram hian kan nei leh tawh lo a, kum 30 dáwn chu direct IPS kan nei tawh lo.

Tun ang zela all India service leh central service-ah Mizote kan tling lo zel a nih chuan kan ramah hnam dang officer an tam tial tial dawn a, sorkar secretary-ah hnam dang an awm fur ang a, bawrhsapah hnam dang an awm belh zel bawk ang. Hnam dang thuhnuaiah Mizoram sorkar hnathawkte an phu suau suau dawn. Hei hi kan duh dan ni lo mah se, kan dinhmun a ni.

Mizoram sorkara IAS post-a state service - MCS, etc. dah an nih ṭhin chungchangah hian sorkar dem ngawt theih a ni lo a, kan dinhmunin a zir lo a ni ber; sorkar hotute duh dan pawh a ni bik lo ang.

Kan ram leh hnam himna atan te, hmasawnna atante all India service leh central service-ah Mizote an luh belh zel a ṭul thu te, Mizo ṭhalaite'n nasa taka ṭan an lak a ngaih thu te, ram leh hnam hmangaihna thinlung nen inbuatsaih a ṭul thute mi tam takin an sawi tawh ṭhin.

Heng ṭhahnemngaihna au-awte hi ménah thlâk mai loin, Mizo ṭhalai, thiam thei leh vengva tak takte'n a takah chantir thei ngei turin ṭan han la sauh sauh teh se. Huaisenna, paukhauhna, tumruhna, ṭhehnemngaihna leh inpekna thûk zel nen Mizo ṭhalaite kan ṭan a ngai a ni e.