CM kawng enin awmzia nei se

Chief Minister chuan October 5, 2024 khan Sairang leh Khamrang (Durlui) inkara NH-06 kawngpui chhe laite a tlawh a; kawng ṭha zawk a awm theih nan theihtawpin hma an lak dawn thu leh, October 9, 2024 hma ngeia siam zo turin kawng siamtute an hrilh a, kawng siamtute pawhin siamṭhat hman a tiam thu a sawi.

Aizawl khawpui chhung leh Mizoram hmun danga kawngpui chhiate chu lo dahtha ta ila; Mizoram mamawh tinreng lak luhna kawng pui ber a chhe lutuk reng mai hi a manganthlak hle mai a, truck neitute leh enkawltute an khawngaihthlak rei tawh hle. Kawng tha zawk neih hlan a nghahhlelhawm tak zet a ni.

Chief Minister-in kawng chhia veia a hmuna a tlawh hi a lawmawm hle mai a; rah tha tak a chhuah a, NH-06 kawngpui chhe lutuk pawhin a ziaawm phah ngei beisei phawt ila. Chutih rualin, CM hi PWD enkawltu a ni lo a, kan state hotupa ber a nihna anga a tih àwm tak a nih rualin, PWD Minister hmalak dan duhkhawp lohna a ang deuh em aw, tia ngaihtuah theih a ni ve bawk.

A eng pawh chu ni se, CM hian Mizoram kawngpui chhiate hi vei zui zel se, a changtu minister-te pawh a tul anga sawipuiin nawrpui zel se a tha awm e; CM berin a bawhzui hi chuan awmzia a nei zawk nge nge thin.

CM-in kawng siam a tih hian kawng chhe zual lai thawm that a nih hmel a; kawng thawm that zawh hun tura sawi chu October 9 a ni a, ni hnih–vawiin leh naktuk chiah hun a awm tawh tihna a nih chu. Kawng chhe zual lai siam zawh hun tura CM-in a sawi hi a takah a chan theih nan kawng thawm thatute'n theihtawp an chhuah a ngai ngei ang; tang sauh sauh rawh se. Chutih rualin, siam zawh leh zawh loh chu kawng siam (thawm that) tur chinah a innghat ve thei bawk a; hun tiama siam zo chungin kawng chhe tak tak a la tam viau thei bawk.

A pawimawh ber chu–Mizoram mamawh tinreng rawn phur luttu lirthei (truck)-te harsa lutuk loa an rawn tlan luh theih a ni; chutiang tur chuan kawng siamtute'n theihtawp chhuah se, sorkar hotute pawhin ngaihvenin vil reng se, a tul angin nawr reng se a tha hle ang.