Social media leh Zo nun mawi

MJA chuan October 7, 2024 aṭang khan cyber crime zirhona an buatsaih ṭan a, Serchhipa a hawnna inkhawmah Chief Minister chuan, fake account hmanga dawihzep taka mi dangte beihna a tam em em a, a tam zual zel a hlauh thu te, fake account hmanga inbeihna ang chi chu sim loh chuan ṭhenawm khawveng inbeih nante hman theih a nih thu leh, Mizo khawtlang nun tichhe thei hian a nih thute a sawi.

CM hian social media-a sawisel duh neite chu hmaikáwr vuah loin, puitling taka sawi chhuah mai ṭha a ti a, chu chu a sawitu leh a dawngsawngtu tan pawh a ṭhat zawk ve ve thu a sawi bawk.

MJA-in Mizoram leh Mizo mipui tana thil ṭha tur zirhona, mipui zirtirna an buatsaih hi a lawmawm. A hawnna huna Chief Minister-in social media hmansualna awm ṭhin te, fake account hmanga mi beihna do let a ṭul thu a sawite hi kan hnam kal zelna atan a pawimawh tak zet.

Hun eng emaw ti aṭang khan Mizo zingah internet leh social media-te hmang sual, pawi khawihna leh mi tihmualphona hmanrua atana kan hman nasatzia kan hre tlang tawh a. Internet leh social media hmangin kan Zo nun mawi kan tichhe mek a ni.

Mi tam tak chuan mahni nihna tak thupin mi tihmualphona thu an thehdarh ṭhin. Heng zawng zawng hi a ngeiawm a, a huatthlala a, Mizo nun mawi tak tichhetu pakhat a ni a; tun ang zela nihna thupa mi beih, mi tihmualpho leh thu dik lo thehdarhte hi kan chin zel chuan kan Mizo hnam nun hi a chhe zual zelin a rinawm.

Fake account hmanga mi dang beih chingte hi Mizo mipuiin kan do ngam a ṭul. Thu dik lo leh thu dik tluantling lo hmanga mi beih ang chi phei chu a huatthlala mai ni loin, dan bawhchhiatna a ni a; chutiang tuartute chuan dan anga hmalak ngam zel ni se; Mizo hnam kal zelna atan thil ṭha zawk a nih a rinawm. Social media hman sual, cyber crime leh a kaihhnawih thilte hi mipui hian palzam mai mai loin, dan ang taka hma lak zel a ṭha e.

Sorkar lama thuneitute pawhin cyber crime hi tun aia nasa zawkin bawhzui se; dan bawhchhiatna a nihna ang takin ngai pawimawh se. Chumi piah lamah chuan, Mizo ram leh hnam nun kal zel tura thil ṭha zawk tur ngaihtuah chungin ngawrh zawka hma an lak a ṭul ta hle a ni.