Eizawnna hna leh kohhran/pawla inhman

Chief Minister chuan sorkar hnathawkte chu an hna ngai pawimawh ber zel turin a chah a, "Kohhranah te, NGO-ahte kan inhmang ṭhin a, thil ṭha tak a ni. Nimahsela, kan hna hi i ngai pawimawh ber zel ang u," a ti.

Chief Minister thusawi hi October 7, 2024-a Serchhipa sorkar department hotute a ṭhutkhawmpuinaa a sawi a ni a; sorkar hnathawkte mai bakah, sorkar hnuai ni kher loa thawk mi dangte tan pawha pawimawh em em mai a ni. Hetiang deuh thu hi sawi a ni fo a, sawi a nih ṭhin chhan chu kohhran leh pawl thil avanga hna ṭhulh fo, mahni hna thawhna hmuh chhuahsan ṭhin an awm vang a ni a; awm lo se sawi a ni lo ang.

CM-in a sawi ang hian, kohhran leh pawla inhman hi a ṭha reng. Kohhran phei chu Kristiante tan a pawimawh em em a, 'Pathian kohhran' tih a ni hial ṭhin. Pathian ringtute tan kohhrana tel hi tih ngei ngei tur a ni a, phak ang tawk tawkin ṭhahnemngai taka inhman pawh a ṭha a, rinna kawnga intihchakna hmun a nih mai bakah, mihring nun inchher puitlinna atana ṭha tak a ni.

Kohhran leh pawla kan nihna ai hian kan ni tin hna kan ngai pawimawh tur a ni a, kan eizawnna hna pui ber aia hmun danga tih tur dang ngaih pawimawh zawk kan neih chuan, mahni hnaa rinawm lohna chi khat a ni. Mahni hna rinawm taka thawh hi a Pathian thu em em a, mahni hnaa rinawm apiangte hi thil dangah pawh an rintlak zawk fo.

Kan eizawnna hnaah dan angin chawlh (leave) kan nei a, dan bawhchhe hauh loin kohhran/pawla tih tur avangin kan châwl a ni thei; mahse, kohhran/pawl thil vanga kan chawlh hian kan hna a khawmuan phah a, ka hnathawh mamawhtu mi tute emaw chuan harsatna an tawh phah thei a ni tih hriat a ṭha.

Pathian ringtu ṭha chuan a eizawnna hna a ngai pawimawh tur a ni a, a hnaah a rinawm tur a ni. Mahni eizawnna hnaa rinawm taka thawk chunga kohhran leh pawlahte ṭhahnemngai taka inhman thiam kan zir chhoh zel a ṭul a ni.