Mizorama hnathawh muang

Mizoram Governor chuan Mizorama hmasawnna hna thawh ṭan tawh, harsatna eng emaw avanga tawpsan lailâwkte chinfel a, hna thawh zawh thuai a ṭul thu October 8, 2024 khan sorkar department/agency ṭhenkhat hotute hmaah a sawi.

Larsapin he thu a sawi chhuah chhan ber chu Sairanga FCI kudam tur sak hna chawlhsan lailawk mek a ni a; kudam sak hi Environment, Forest and Climate Change (EFCC) department-in reverine reserve forest huam chhung a ni tia an tihbuai vang a ni.

Governor thusawi hi Mizorama thil thleng fo ṭhin a ni. Kan ramah hmasawnna hnathawhte a hun taka zawh loh a tam em em a, a bik takin project lian leh hna lian thamte phei chu zawh hun tura tiha zawh hman loh a ni deuh vek em ni chu aw, tih tur a ni.

Mizorama hmasawnna hna thawh a muang ṭhin leh zawh hun tura zawh a ni lo ṭhin hian chhan tam tak a nei ang. Hna ṭhenkhatah chuan ruahtui tam vanga hna thawh theih hun (working season) tam tawk lote chhuanlamah sawi a ni ṭhin; a dikna chen pawh a awm ang. Mahse, working season rei tawk lo hre reng chunga project & estimate siam a ni ṭhin ngei ang a; chuvangin, working season rei tâwk lo hi chhuanlam dik tluantling lo a ni thei ang.

Hna ṭhenkhat chu Forest department lam aṭanga harsatna awm a ni ṭhin. Tun hnaia a langsar deuhah chuan – Larsapin a sawi FCI kudam sak tur te, Lengpui rama NIT-Mizoram sak tur te, Vairengte-Sairang NH kawngpui thlúr lía laih turte hi a ni. A dang pawh a awm àwm e.

Hmasawnna hna thawh tur leh thawh mek hrang hranga harsatna awmte hi chinfel vat vat a ṭul a, state state sorkar emaw, chingfel theitute'n hma an lak vat vat a, an chinfel thuai thuai a ngai. State sorkarin a tih tur chinah chak takin a bawhzui tur a ni a, official-te'n mahni ṭánghma hai loa hma an lâk a, an tih tur chin ṭha taka an tih a ngai. Hna thawktute pawhin chhuanlam dap kual loa hun tiamah zo hman ngei tura an thawh a ngai a ni.

Mizorama hmasawnna hnathawhte zawh hun tura ruata zawh loh a tam em em mai hi a mak a; a tuartu chu mipui an ni. Hmun hrang hranga kawng siam, a huna zawh lohte hi mipuiin an tuar nasa tak zet. Hna muang hi khawi laiah emaw, tute emaw inthlahdah vang a nih ngei a rinawm.

Kan rama hnathawhte zawh hun tura ruatah zawh ngei a nih theih nan sorkar hian ṭan a lâk lehzual a ngai a; harsatna awmte chingfel tura a bawhzui chak a ngai a, hna thawktute ṭha taka a vil a, na taka a nawr zel a ṭul a ni.