Kawng tlo lo leh hmanraw ṭha lo

Mizoram State Project Moni-toring Committee (MSPMC) hotute chuan October 10, 2024 khan NH-54 kawngpui, Serchhip leh a chhehvela mite an endik a; kawng siamna atana hmanraw hmante a ṭha tâwk lo nia an hriat thu leh kawng siam dan chu an duhkhawp loh thu an sawi.

MSPMC hotute hian Mizorama NH kawngpui siamte chu a ṭhat tawk loh avangin fûr khat pawh daih lo a nih ṭhin thu te, NH kawngpui siam mekte pawh siam zawh a nih hmain siam hmasakte chu a chhiat leh tawh thute an sawi bawk a. Kawng chungchangah court aṭanga harsatna an tawh loh nan a ṭha thei ang bera kawng siam tur leh, kawng chhe leh tawhte chu a rang thei ang bera siam ṭha leh turin kawng siamtu contractor-te an chah a ni.

NH-54 kawngpui siam meka MSPMC-in an endik lai bik, Chhingchhip-Keiṭum inkar hi zawh thawkhat a ni tawh a, zawh loh tlem a la awm. Siam zawh tawhte chu hmun eng emaw zatah a chhe leh tawh; a tlo lo tak zet. Kawng siam zawh tawhte hi a mám pur a, mahse, kawng siam lama tawnhriat nei lo tan pawh han en mai hian a chhah tâwk lo hle tih a hriat theih; hei hi a chhiat leh hma chhan a ni thei ang em?

MSPMC vek hian tun hnaiah Saitual leh Saichal inkara quarry pakhat an endik a, lungte chu a chang ṭha lo hle tih an hmu. Chu quarry-a lungte chu a chang ṭha lo chungin NH kawngpui siam nan NHIDCL hnuaia contractor-te'n eng emaw zat an hmang tho nia sawi a ni.

Lirthei lian tak tak rit phurte dâwl zo tur lung chang ṭha Mizoramah a awm lo nia sawi a ni ṭhin; chutiang chu a nih pawhin state páwn aṭangin lung chang ṭha lak mai àwm tak a ni. Hetiang zawng hian kawng siamtute'n ngaihtuahna hmang se, sorkar lam pawhin nawr rawh se. Lung a chang ṭha tâwk lo tih hre reng chunga hman luih tlat hi a dik lo.

Mizoram hmun hrang hranga NH kawng siamtute hi Mizoram mi an ni lo tlangpui a; kawng an siam dan enin contractor-te hian Mizoram mipui hi min ngainêp hle niin a lang thei hial.

Chief Minister-in a kaihhruai sorkarah kawng siamte a tlo tur a ni tih a lo sawi tawh. Hei hi sawi maiah tàwp lo se, a taka a thlen a ngai. Kawng siam a tlo theih nan contractor-te'n kawng an siamte hi sorkar hotute'n uluk taka an vil a ngai a ni.