RTI hman ṭangkai

Chawlhkar liam ta kha Right to Information (RTI) Week (October 5-12) a ni a, district khawpui hrang hrangah hman niin, hman hun erawh a inang lo.

Aizawla RTI Week hmannaah IPR Minister chuan, RTI Act chu sorkar khalh ngíl a, sorkar hnathawkte fimkhurtirtu ni zel se a duh thu a sawi a; sorkar kal dan vil chu eptu political party-te chauh ni loin, mi tin mawhphurhna a nih thu sawiin, RTI Act chu taima taka hmang turin mipui a chah.

RTI hmanga sorkara information dil hi a tìr lamah chuan mahni ngei che chhuaka buaipui a ngai a, pawisa pawh information pek chhuah zat azirin sên tur a awm nual. Tunah erawh chuan a awlsam ta hle, mahni in lum aṭangin online hmangin a dil theih tawh a, pawisa sen ngai a awm mang tawh lo bawk; he awlsamna hi mipuiin kan hman ṭangkai thiam a ṭha.

Sorkara kan hriat duhte hi RTI hmanga hriat theih a ni tlangpui a, thurûk deuh puanzar phal loh tlem azawng erawh a awm. Sorkar hotute leh official-te thil tih dan te, sorkar leh department hmalakna dik takte hre turin mipuite'n taima takin RTI hman ṭangkai i tum ang u.

Tunlaiah social media-ah thu dik tâwk lo a darh nasa a, chu chuan mi tam tak rilru hruai sualin, ngaihdan a hruai kâwi thei. Social media-a thu dik lo léng vêl karah thu dik tak hriat nan RTI hi awlsam taka hman ṭangkai theih a ni a; mipuiin kan hman ṭangkai a ngai. Minister sawi angin, sorkar khalh ngìlna remchang leh sorkar kal dik lo tur vênna ṭha tak a ni.

Hetih rual hian, sorkar official (SPIO/ASPIO/DAA)-te'n dik taka information an pek chhuah a ṭul. Tun hnaia Assembly session-ah Chief Minister thusawi leh department-in information an pek chhuah inmil lo a awm a, CM-in a thu sawi chu a dik zawk thu a sawi. CM thusawi a dik zawk a nih chuan department lamin RTI hmanga information diltu hnenah information dik lo an pe chhuak tihna a ni.

Sorkar official-te'n information dik taka an pek chhuah a ṭul a, hun tiam chhung ngeiin an pe chhuak tur a ni a, an tikhawtlai lui tur a ni lo. RTI hmanga zawhna chhanna buatsaih leh siam hi sorkar hnathawkte'n an ning tur a ni lo a, sorkar hnathawk an nih angin an hnain a ken tel a ni tih an pawm tur a ni.