Mipuiin zir tur kan nei

Mizoram leh Assam-in ramriah buaina kan neih avangin tun hnaiah Assam lamah kawngpui dan chah a ni a, ni eng emaw zat chu bungraw phur lirtheite Vairengte kal tlangin a lo lut tawh lo. Ei leh in turah harsatna la awm lo mah se, petrol leh diesel lamah erawh harsatna a thleng ṭan mek a ni. 

Assam-in ramri chungchanga Mizoram min tihbuai tirh khan sorkar lamin thuchhuah an neih zingah mipuite hnena ngenna a tel a, chutah chuan bungrua inchuh lo tur leh 'sem sem dam dam' tih rilru pu chunga kan hun tawn mek hi pheichheh rual taka hmachhawn turin mipuite an ngen a ni. 

Kawngpui an dang dawn tih thawm a awm aṭangin petrol leh diesel chu namen loin kan inchuh nghal a, midang tana inken lam a lang vak lo a, kan chang lo bik ang tih hlauin kan buai a ni ta ber. Hei bakah hian nitin mamawh ṭul tam tak kan inchuh a, dawr pawh a lun a, hmun ṭhenkhatah phei chuan thui tak an intlar nghe nghe a ni. 

Tuna kan harsatna tawh mek avang hian Mizoram chhungah harsatna dang chhuah belh lo se, mitinin mahni mamawh tawka liam chuh loa midang ken hi kan zir thar a ngai khawp mai. Hetihlai hian sumdawng lam pawhin an bungraw neih sate a man pang­ngai aia toin hralh lo se, nakina man sang zawka hralh theih beiseiin chheprelh lo bawk se, hnam dang nena buaina kan tawh hi inpumkhat phahna atan hman i tum ang u. 

Harsatna leh buaina hi hmun dangah pawh an tawk ve fo a, a fing chuan zirlai zir phahna atan an hmang ṭhin - ramri buai avang hian nitin mamawh thil a luh ṭhat loh vangin kan buai deuh maithei - mipuiin a ṭha zawnga zir chhuah neih i tum tlat ang u.