Sorkar pisa kai hun vawn dik

Chief Secretary chuan October 11, 2024 khan office memorandum a tichhuak a; sorkar hnathawkte chu pisa kai hun chhung ngai pawimawh turin a hriattir a, pisa kai hun chhunga awm tluan lote lakah disciplinary action lak tur a nih thu a puang.

Mizoram sorkar hnathawk zinga tam takin hnathawh hun, pisa kai hun chhung an ngai pawimawh loa sawi a ni ṭhin a; Chief Secretary-in tun hnaia memorandum a tihchhuahah pawh pisa kai hun vawng dik tura hriattirna thuchhuah vawi eng emaw zat siam a ni tawh thu leh, chuti chung chang officer leh thawktute zingah pisa kai hun chhunga pisaa awm tluan lo an awm ṭhin tih hriat a nih thu a tarlang.

Tun hma aṭangin Mizoram sorkar hnathawkte'n pisa kai hun an vawng dik lo a, pisa ṭan huna thleng hman lo leh bàn hun hmaa pisa aṭanga chhuak/haw ṭhin mi tam tak an awm ṭhin. Pisa kai hun vawng dik turin sorkarin hma a lo la tawh ṭhin a, mahse, sorkar hnathawk zinga tam takin an zâwm ṭha tâwk lo.

Tuna sorkarna chelh mektute'n thuneihna an chan hnuah an khauh thar a, sorkar hnathawkte pawhin pisa kai hun an vawng dik deuh niin a hriat a; mahse, hun a kal a, an inthlahdah leh tial tial niin a lang. Zing dar 9-ah pisa thlen tawh tur a nih laiin, mi ṭhenkhat chuan zing dar 9:30 vel hi pisa kai tura in aṭanga chhuah hunah an ngai emaw ni chu tih tur a ni hial.

Pisa kai hun vawng dik lote hi thawhpuite tan an hnawksak fo a, thawhhona boruak tichhetu an ni ṭhin; mipui tan harsatna siamtu an ni bawk. Sorkar hnathawkte hian pisa kai hun dik taka vawn hi an tih tur, an tihmâkmawh a ni a; Pathian ringtu nihna ang pawhin an tih ngei tur a ni.

Sorkar pawhin pisa kai hun hi khauh zawka a kenkawh a ngai. Thupek chhuah ringawtah duhtâwk loin, thupek chu sorkar hnathawkte'n an zawm leh zawm loh enfiah ṭhin a ṭul. Chumi tur chuan sorkar pisa tina hotu lute an pawimawh a, inthununna (discipline) kengkawhtu tur, pisa kai hun an vawn dik a nih theih nana thawktute thununtu tur an ni. Sorkar thupek zâwm loa pisa kai hun vawng dik lote inhrethiam zel lo a, an chunga hremna lek ngei a ṭul bawk ang.