Sorkar leh NGO

Sikul kai hun sawn hma chung­chang enfiahtu tur committee chu Mizoram sorkarin state leh district level-ah a din dawn a, hetah hian Mizo Students Union (MSU) aiawh tel turin sorkar leh MSU-te chu tun hnai khan an inrem.

Hun rei tak ata tawh Mizoram sorkar hian thil pawimawh ngaihtuahtu turah NGO aiawhte dah tel a ching a, hei hi a ṭhatna awm thei bawk mah se, thil zawng zawnga NGO inrawlhtir hi a ṭha ber lo. Sikul ṭan hma an ennawnna turah pawh hian âwn lam nei sa pawl aiawh dah pawh hi a fuh lo palh thei a, sorkar hi a kal fimkhur loh chuan eng pawl emaw duh dana kal mai mai angin a la lang thei ang.

Khawvel hmun tinah pressure group hi an pawimawh a, democracy sorkar hnuaiah phei chuan sorkar khalh ngiltu pawimawh tak an ni. Hetihlai hian Mizoram sorkar kal danah hi chuan a nêk leh nawr theitu apiang lam ṭanga siam tum ang mai hian a kal a, committee pawimawhah NGO aiawhte an ṭhu leh vung ṭhin a, hei hi kalphung fel lo tak niin a lang.

YMA, MZP, MHIP, MUP leh pawl dangte pawh hi an telna âwm ngawih ngawih chin chu a awm ngei ang a; nimahsela 'quota nei' ang hrima an tel tam ta lutuk hi chu sorkar kal zelna atan a him berin a lang lo. Heng pawlte hi an pawimawh a, an ṭangkai a; nimahsela sorkar inrelbawlnaa an inrawlh thûk poh leh sorkar hi a buai phah ngeiin a rinawm.

NGO-te pawi­mawhna leh ṭang­kaizia hretu chu Mizoram mipui kan ni a; amaherawhchu an inrawlh tam lutuk chuan an pawl tan pawh a ṭha lo a, sorkar tan a ṭha lo lehzual. Tuna kan kal danah hi chuan sorkar hi sorkar angin a kal ngam meuh lo a, a roreltu tur hian a dotu apiang a tlawn a, kal tum lam nei ngam loin a tam lam apiang a âwn zel hi a ang ber.

Sikul ṭan hma an ennawn lehna tura zirlai pawl aiawh tel hian eng thil nge a nghawng dawn hriat a ni lo a, he thilah kher lo pawh sorkarin NGO-te a dah pawimawh lutuk hi thil finthlak ber a ni ngai lo ang.