MYC hman ṭangkai lehzual ni se

Mizoram Youth Commission (MYC) Chairman chuan October 14, 2024-a Aizawl West College buatsaih hun a hmanpuinaah Mizo ṭhalaite'n India ram hmun hrang hrang bakah, khawchhak lam Japan, Korea, China ramte an dai dar dawn thu leh chumi tur chuan MYC hian hma an lak mek thu a sawi.

MYC hi kawng hrang hranga Mizo ṭhalaite hamṭhatna tura hma la tura din a ni a, tuna hma an lak chinah chuan ṭhalaite eizawnna tur kawng zawnpui leh chumi atana thiamna an neih theihna tura buatsaih leh inzirna ruahmante a ni ber.

MYC hmalaknate hi ṭhalai, mi tam tak tan hmasawnna leh hlâwkna a nih a rinawm a, a lawmawm. Hun kal zel turah pawh theihtawp chhuah zel se, hotu báwra mimal hamṭhatna leh hlâwkna hmuh tum loin, Mizo ṭhalaite hmangaihna leh duhsakna nen ṭan la zel se; a chhawrtu tur chu Mizo ṭhalaite leh Mizoram an ni a, a hlu hle dawn a ni.

Mizoram chhungah Mizoram ṭhalai, lehkhathiamte leh zirna lama thleng sang vak lote tan hlâwk thamin hna thawh vek theih a ni lo a, state pawnah - India ram chhung leh páwnah hna thawh tur kan zawn nasat tial tial a ngai ang. State pawna hna thawk turin eng kawng emaw taka thiamna leh theihna neih a ṭul fo a, chutiang atan chuan MYC hian ngawrh lehzualin ṭan la zel rawh se.

All India service leh central service-ah Mizo tling an tlem ta leh tun hnaiah tling an awm thei ta meuh lo hi Mizo mipuiin kan vei tlang. MYC-in UPSC exam atana ṭhalaite inbuatsaihna a buatsaih leh a ṭanpui ṭhin hi a ṭha em em a, mahse, tun thlengin tlin phah an la awm lo; hemi kawngah hian awmze nei zawk tur leh thûk zawka hmalak a ngai niin a lang. MYC leh state sorkar hian ṭan la lehzual se a ṭha hle ang.

Ṭhalaite tana hna thawh tur zawnna leh hna thawk thei tura buatsaihna atan MYC hi state sorkarin ṭangkai lehzualin hman tum se, an ṭangkai lehzual theih nan sum leh pai an mamawh belh zel ngei ang. State sorkar hian MYC a chhawmdawl zel a ṭul a, hlâwk zawk leh chhawrnahawm zawka a kal a, nasa zawka hma a lak theih nan sum a pelh belh zel pawh a ṭul awm e.