Sumdawnna lirthei leh sorkar rate bithliah

Lunglei District High Powered Committee (HPC) Vice Chairman, MLA ni bawk chuan October 15, 2024-a Lunglei Auto Rickshaw Owners Association silver jubilee lawmna a hmanpuinaah, sorkarin lirthei chuan/hman man (rate) a bituk anga dik taka tlan turin auto-rickshaw enkawltute a chah.

MLA leh Lunglei HPC Vice Chairman thusawi, autorickshaw khalhtute a chah hi a pawimawh hle mai. Tunah hian sumdawnna lirtheite hian sorkar rate bithliah hi an zâwm chiah em, sorkar thupek an zawm reng em? Ram hruaitute'n lirthei enkawltute hnena rate zawm tura chah an ngaih chhan hu sorkarin rate a bithliah aia toa lirthei hman/chuan man an lâk ṭhin vang a ni tih, mipui thinlungah a chiang maiin a rinawm.

Kum eng emaw ti kal ta aṭang khan Mizoramah mihring phur chi sumdawnna lirthei chi hrang hrangin sorkarin rate a bituk ang taka an tlân lohzia sawi a tam tawh ṭhin. Rate bituk aia sanga an tlàn tlangpui thu te, a bik takin taxi–four wheeler leh two wheeler-te phei chu rate aia sang féa an tlân thute sawi a tam hle.

Sorkarin sumdawnna lirtheite tana rate a bithliah hi bithliah satliah a ni lo a, lirthei enkawltute'n an zawm tura tih a ni. Rate bithliah ang taka tlân hi sumdawnna lirthei enkawltute mawhphurhna, an tihmâkmawh a ni a, rate bithliah aia sanga an tlan chuan hrem theih an ni tih an hriat reng a pawimawh.

Tun hnaiah sorkarin tuialhtheia chhiah lâk a tihpun avangin tuialhthei man a pung a, chumi avang chuan sumdawnna lirthei pawl hrang hrangte inthurualin nawrh an tum a, mahse, sorkar hotute nen an indàwr hnuah an nuar rih lo.

Sumdawnna lirthei neitute leh enkawlhtute'n tuialhthei man 5% vela a pun avanga nawrh an huaihawt ngam a, sorkar an nawr ngam a nih chuan sorkarin rate a bithliah ang takin an tlàn ve tur a ni. Sorkarin sumdawnna lirtheite rate a bithliah ang taka an tlan hi mipui pawhin an beisei a ni. Rate aia toa tlânte chu mipui hian dodal ngam ila, namnûl mai loin thuneitute hnenah thlen ṭhin ila a ṭha hle bawk ang.