Dan anga thil kalpui zel a him

Mizorama hnam dang dan loa sumdawngte dapchhuah dan relin tun hnaiah Home department additional secretary hoin MZP hruaitute an ṭhu khawm a. Dan kalha thil tite chu dan ang taka hrem an nih theih nana hmalak an rel a; hetih rual hian hnam dang dan loa sumdawngte dap chhuah kawngah tlawmngai pawlte'n anmahniin hma la tawh lo se, an ti bawk.

Tun hnaiah Mi­zoramah hnam dang dan loa sumdawng eng emaw zat an awm leh tawh niin a lang a, heng mite dap chhuah kawngah hian sorkar hi a muthlu rei ṭhin hle. Tlawmngai pawl lamin ram tan tiin heng mite dap chhuah hna hi an thawk a, ram tan hna ṭangkai tak thawk ni mah se, an thil tih hi dan mit aṭanga thlir chuan dan bawhchhiatna a tling. Hei hi state ṭhenawma pawlte pawhin hriain dan loa hnam dang sumdawngte dap an nih chu an hrethiam lo a, kawngpuite an dang hial a ni.

Dan bawhchhiate dap chhuah hi dan ang taka kalpui theih a ni a, chumi kawngah chuan sorkar thuneitu lam an chêt a ngai. Anni lamin an tih tur an tih loh ṭhin avangin tlawmngai pawlte an thawk chhuak a, chu chu 'dan bawhchhia' angin an lang leh mai ṭhin. Hemi chinfel theih dan awm chu police lamte nen ṭang ruala dan ang taka thawh chhuah a ni mai a, chumi tura ruahmanna siam pawh thil harsa niin a lang lo.

Mizorama dan bawhchhiaa hnam dang sumdawngte awm hi kan duh lo tlang a, hei hi thuneitu lam beng pawh a thleng tawh a, zirlai pawlte nen ṭha taka an sawiho thei hi thil lawmawm a ni. Dan loa awmte kan dap dawn a nih pawhin dan ang taka kal zel hi a him a, dan hnuaiah zel theihtawp chhuahin dan loa awmte dap chhuah hna hi thawk zel se a ṭha ang.