ASF tuartute tana sorkar duhsakna

Disaster Management & Rehabilitation (DMR) department chuan vawk pûl hri lêng mek African Swine Fever (ASF) chu state disaster-ah a puang a, State Disaster Management Authority (SDMA) hriatpuinain kum 2024-a khuarel chhiatna zingah ziah luh a ni.

ASF state disaster-ah puan a nih avang hian SDMA chuan ASF vanga Mizorama vawk thi neitute hnenah, Disaster Management Act, 2005 hnuaiah State Disaster Response Fund aṭangin zangnadawmna a pe thei dawn. ASF vanga vawk thi, zangnadawmna dilte chu an vawkte ASF vanga thi a ni ngei tih veterinary officer-in an finfiah tur a ni a, SDRF guideline angin vawk pakhatah zangnadawmna Rs 4,000 zel pek theih a ni.

ASF vanga vawk thi neitute hnenah zangnadawmna pek theih a ni ngai lo a, ASF vanga vawk suat neitute tan chuan sorkar laipui aṭangin Assistance to States for Control of Animal Disease hnuaiah zangnadawmna pek theih a ni thung a, mi tam tak pek an lo ni tawh ṭhin.

October 14, 2024 thleng khan ASF vangin Mizoramah vawk 1,09,498 a thi tawh a, chu'ng zinga a tam zawk – vawk 61,136 chu ASF vanga thi (suat ni lo) a ni. Vawk suat ni lo, ASF vanga thite hi zangnadawmna pek theih a nih loh reng avangin vawk neitute'n an vulh thlâwn ringawt mai a, an sum hloh hi a tam tham hle ang.

Mizoram sorkarin ASF vanga vawk thi neitute hnena zangnadawmna pek theih dan tur a ngaihtuah leh, pe tura ruahmanna a siam ta hi a ṭha hle mai a, vawk neitute tan a ropui tak zet a, ASF vanga vawk thi neitute rilru natnate pawh a chhâwk huaiin a rinawm.

Sorkarin vawk vulhtu harsatna tâwkte a duhsak a, chhawmdawl a duh ta sa sa, ASF vanga vawk thi neitute hnena zangnadawmna pek tur hi sorkar hian ṭha takin kalpui ngei se. Fimkhur tak leh dik taka kalpui a ṭul dawn a; a hmu tur dik takte'n ṭanpuina an dawn theih nan thawktute leh mawhphurhna nei zawng zawngte fimkhur tak, huaisen tak siin hma la rawh se.