Dan loa driving license siam

Central YMA hruaitute'n October 16, 2024 khan Transport Minister an hmu a, Aizawl District Transport Officer (DTO) pisa atangin lirthei khalh phal lailawkna learner licence leh khalh phalna driving licence eng emaw zat dan loa pek chhuah thin a nih thu an thlen a, finfiahna an neihte an pe nghal.

CYMA hmalakna bawhzuina nia ngaih theihin Aizawl DTO (LA) chu October 17, 2024 khan sorkarin a chawlh lailawktir (suspend) nghal. DTO pisain dan loin license an pe chhuak ngei a ni tih CYMA hruaitute'n finfiahna an neihah a chiang viau a ni ngei ang.

DTO hi dan loa thil ti a nih ngei chuan hrem nghal mai hi tih àwm tak a ni. Chutih rualin, DTO chauh hi mawhphurtu ni loin, mi dang inhnamhnawih an awm nual ngeiin a rinawm a, chungte pawh chu chhui zui a, dan loa learner license leh driving license siamnaa inhnamhnawih apiangte chu hrem ngei tur an ni ang. Sorkar hnathawk lo zingah inhnamhnawih an awm a nih pawhin, thubuai siamsak theih an nih a rinawm. Dan loa driving license siam a tawp theih nan sorkar hian bawhzuiin chhui zui zel ngei rawh se.

CYMA hruaitute'n Transport Minister an ngen zuina–dan loa driving license pek chhuah tawhte tihtawp (cancel) vek tura ngenna pawh Transport department-in an bawhzui tur a ngai ang. CYMA lamin eng emaw chen an lo chhui tawh a, finfiahna tha tak an lo nei tawh bawk a; CYMA-in finfiahna an lo neih tawhte license chu sorkarin a cancel ngei tur a ni ang a, YMA-in an la hmuh chhuah lohte pawh eng emaw zat a la awm thei a; chungte chu sorkar hian bawhzui zel ngei tur a ni ang.

Tun hnaia media thenkhatah document hrang hrang siam theia inzuar an awm fo mai. Document pawimawhte hi sorkarin a pek chhuah turte a nih avangin, document siam thinte chu dan loa thil ti an ni tihna a ni. Ram dang atanga sahimna zawnga Mizorama awm mek mi eng emaw zat an awm bawk nen, document chi hrang hrang pek chhuah danah sorkar a fimkhura a fîr a ngai a, mawhphurtute a vil that lehzual ni.