Zirlaite hmabak

MBSE chuan High School Leaving Certificate (HSLC) Examination, 2015 result a tichhuak a, zirlai exam mi 17,157 zinga 11,719 an pass a; pass percentage chu 68.30 a ni.

Tlemlai deuh khan Mizote zingah zirnaah rau rau pawh HSLC hi a pawimawh ber a ni ta emaw tih turin kan buaipui ṭhin a, board exam kan tih mai zingah primary school leh middle school level-te aiin kan dah pawimawh ṭhin. HSLC hi a pawimawh tehmeuh mai a, zirna kailawn pawimawh tak a ni a; nimahsela HSLC ṭha taka zawh hi a tawpna a la ni lo tia kan infuih thar zel a ṭha hle.

Zirnaah hi chuan kan bul ṭanna lamah tiṭha tawk lo mah ila, zirna sang zawk kan chhun­zawmnaa result ṭha neih hi a pawimawh zawk hial awm e. Engpawhnise a bulṭhut aṭanga zirna lama tihṭhat hi a pawimawh hmasa a, chutihlaiin HSLC-a tiṭha lote tan pawh hnual viauna tur a la ni lo a, insiamṭhatna hun ṭha an hmaah a la inhawng zau tih an hriat a ṭha ang.

HSLC lama result nei ṭha­te tan pawh an hlawhtlinna hmasa hi hlawhtlinna tluantling a la ni lo tih an hriat chian a ngai a, tuna an result neih hi zirna sang zawkah chhawm theih a ni meuh lo a, chuvangin nasa zawka zir tura inbuatsaihna rem­changah hmang thiam se a ṭha hle.

Result neih ṭhat hi a aia sang zawk kal­naah beiseina siamtuah hmang ṭangkai thiam se, chu chuan an hmalam hun pawimawhah nasa takin a pui ngei ang a; chutihlaiin result nei ṭha lote pawh hnual mai lo se, an hmabak zirnaa insiamṭhat zel hi an hlawhtlinna kailawn tur a ni tih an hriat a pawimawh awm e.