Minister leh AR sipaite inkar thu

April 17, 2024-ah Mizoram Minister of State pakhat chu Zemabawk thlangah Assam Rifles sipaite'n an lo tiding a, hun eng emaw chen an inhnial buai. Minister hi a hmain AR sipaite'n Kawlbemah an lo tiding tawh a, Ngopa daiah pawh tihdin leh an tum a, mahse, ding duh loin an tlân tlanga sawi a ni bawk.

Minister chunga thil thleng hi eptu MLA te, political party leh pawl thenkhatun an ngaimawh a, minister thlavang an hauh. AR chet dan an dem thu leh enliam mai lo a, bawhzuia chhui chian tha an tih thu an tarlang hlawm.

Hetih lai hian, AR lam pawh an insawithiam ve tho a; minister chu an tiding lo a, anmahni duh thua ding an nih thu leh thiamthu chi hrang hrang an tichhuak ve bawk. Video aṭanga a lan dan chuan AR-te hian minister team hi an lo tiding ngei niin a lang.

State sorkara hotu sang tak mai AR mi leh sa, officer tenau tak hoa an lo tiding hi a mak angreng khawp mai a, thil thleng àwm lo taka ngaih theih a ni. Minister hi Mizorama AR hotu lu ber nen pawh order of precedence-ah an la insan hleih viau a; eng emaw avanga minister leh a team-te lirthei enfiah ngei a tul a nih pawhin, officer sang tak hoin minister zah tak chungin leh hawihháwm takin enfiah an dil tur zawk ni awm tak a ni.

AR ten an lo dan hi Power & Electricity Minister a ni a, AR ten an tihbuai avangin AR awmna hmun hrang hrangah power supply tihtawpsak a nia sawi a awm. Hei hi a dik a ni thei a, a dik chiah lo thei bawk ang. Zemabawk thlanga Minister dan buai a nih hnu lawkah AR awmna hmunahte power supply a awm lo ngei a, hei hi Minister dan buai nen sawi zawm theih tak a ni awm e.

Minister team lam sawi leh AR lam sawi dan a inang lo a, thiam an inchan ve ve. Thil thleng hi mipuiin an ngaihven em em a, ngaih thutak tur chi a ni bawk a; chuvangin, thil thlen dan dik tak chhui chian ngei a tul.

Mizoram sorkara nihna sang tak nei, minister of state meuh AR sipaite'n an lo tihdin chungchanga minister team lam atanga thil awm dan an sawi hi a dik a nih chuan enliam mai loa a tul anga bawhzui ngei chi a ni. Phuba lâkna ni âwm taka ngaih theiha power supply tihtawpsak tih vel hi chu a ho tham a, a rilru têt thlak ang pawhin a ngaih theih. Thil thlen dan dik tak AR enkawltu Ministry of Home Affairs hotute hnena thlen a, a ṭul anga hma la tura ngen mai hi tih dan tur dik zawk a ni ang.

Tun thil thlenga hmalak zui danin nakin zela AR ten Mizoram sorkar leh hotute leh mipui min en dan a hril theiin a rinawm a, chuvangin, Mizoram mipuia insawithiamnaah duhtâwk mai loin, awmze nei zawka hmalak zui a ngai ni.