Radio rawngbawlna

All India Radio, Aizawl Station chuan tun hnai khan kum 50-na, golden jubilee an lawm. AIR Aizawl Station hi July 31, 1966-ah din a ni a, tunah hian ni tin primary programme darkar 14 an tichhuak a, FM Zoawi chu ni tin darkar 8 an tichhuak a; thawktu nghet 77 awmin con-tract staff eng emaw zat an awm bawk.

Mizorama media pawimawh ber pakhat chu radio hi a ni a, chatlak loa kum 50 chhung Mizo mipuite tan rawng an bawl ta. Anni hi chuan chawlh an nei ve lo a, sakhaw hunpui berah pawh mipui tana an rawngbawlna an kalpui zel a, rambuai hun harsa takah pawh radio hian mipui tan ṭangkai takin hna an thawk reng a ni. Radio pawimawhna hi thawkkhatlai khan tlahniam deuhin lang ve mah se, tun hnaiah programme tharte an neih piah lamah radio ngaihthlak theihna thar a chhuak zel a, radio pawimawhna leh ṭangkaina hi a zau zel a ni.

Ram changkang zawkahte phei chuan private radio station hrang hrang a awm a, mahni programme duhzawng herh chhuah theiha awmin mipuiin an lawm a; zai ngainatute leh chanchinthar ngaihven mite tan a ṭangkai a, thu leh hla lam tuipuitute tan pawh radio hi a hlu hle a ni. Mizoramah pawh radio prog-ramme pangngai bakah FM Zoawi kalpui a ni a, mipuiin an lawmin ngaihthlak a hlawh hle a ni.

Radio-a chan-chinthar puante hi rintlak leh dik bika ngaih a ni a, radion hi chu tisual ve thei lo ang hiala ngaih ṭhin a ni. Zaithiamte tan radio hi lar chhuahna remchang a nih piah lamah sum an lakluhna ṭha a ni a, zai ngaina Zofate tan phei chuan a hlutna hi a sang takzet a ni.

Hetihlai hian AIR, Aizawl pawhin ṭan a lak zel a ngai a, chanchinthar an puan dan ṭawngkamte pawh tun hma angin uluk thar leh se, lam sual palh mai ni loa lam dan dik hre lo ang maia thil puan awm zauh zauhte hi tihtawp theih ni se, thawktu senior leh thu leh hla lama tui mite'n thawktu tharte an zirtir taimak deuh a ṭha ang.

All India Radio, Aizawl Sta-tion-in kum 50 a lo tling ta hi an lawmpuiawm a, kum 50 chhung thu leh hlaa Mizote awitu ber an nih vang hian Mizo zawng zawngin an lawmpui ngei ang.