Document lem tamna ram?

Tun hnaiah Central YMA chuan driving license lem an man a, a siamtu chhuiin Transport department-a IV grade pakhat kaltlangin a ni tih an hre chhuak.

Mizoramah hian document lem hi a tam ta hle niin a lang a, a pawi khawp mai. Driving license lem pawh hi chi hrang hrang a awm niin a lang a, a ṭhente chu computer thiam deuhin an siam chawp mai te a ni a, tun hnuah card an hman hnu thleng hian a lem an la siam chawp zel a, Manipur driving license nei zingah a lem a tam hle niin an sawi bawk.

Birth certificate ni se a lem tam tak hmuh tur a awm a, document pawimawh tak tak zingah hian a lem sawi tur a awm ta fo mai. Ṭhenkhatin zirna lama an document neihte pawh hi a lem a awm an ti a, document lem hmanga sorkar hna hmute hial pawh an awm niin an sawi lehzel a, a vanduaithlak hle a ni.

Hei mai hi a ni lo, hnam dangte Mizorama an lo luh phalna ILP ngei pawh a lem a awm a, ILP pek chhuah danah pawh thil rin-hlelhawm a awm zel a, hei hi hnam tan a him lo takzet a ni.

Tun anga kan kal zel hi chuan Mizoram hi kan ṭhenawm state-te ang maiin document lem tamna ramah a chhuak ang tih a hlauhawm a, document lem hmanga hamṭhatna zawnna rama kan chhuah mai hma hian, thuneitu lamin an tih tur an tih a ṭul takzet a ni.