SHC inthlan atana campaign

Sinlung Hills Council (SHC) inthlanpui chu November 5, 2024-ah neih a ni dawn a, inthlan hun hi State Election Commission chuan October 7, 2024 khan a lo puang tawh a ni.

SHC inthlanpui atan hian tunah hian campaign vânglai a thleng chho mek a, a huam chhungah political party hrang hranga hruaitu lawk lawk tak takte an kal tawh a, party worker ṭhahnem takin an chàmchilh mek bawk a; party hrang hrangte'n rorelna chan tumin ṭan an la mek.

India ram hi inthlan ram kan nih angin huam chin neiin kan inthlang ṭhin a; local/village level-ah te, district council leh municipal council/corporation-ah te, state assembly leh parliament thlengin mipuiin kan aiawha roreltu turte kan thlang ṭhin. Heng hruaitu leh roreltu thlannate a pawimawh em em vek mai a; mipuiin kan duh kan thlang thei hi a hlu hle.

Inthlan hi thianghlim taka kan kalpui zel a ṭul a, chumi tur chuan mi tinin pawimawhna kan nei. Rorelna chelh tura candidate siamtu political party-te leh an hruaitu leh worker-te an pawimawh a, candidate-te an pawimawh a, thlangtu mipui pawh an pawimawh. Mi tin kan pawimawh avangin kan phak tâwk ṭheuhah inthlanna felfai, thianghlim, zalen leh ralmuang a awm theih nan kan tih theih chin ṭheuhah tan kan lak a ngai.

Political party te, candidate te, party worker-te hi tlin duh vek an ni a; tlin tumin theihtawp an chhuah tur a ni ngei mai a, mahse, tlin tum luat avanga mawi lo taka chêt te, party dangte leh candidate dangte sawi chhiat bâwih bâwihte hi chu ti lo vek thei ila a duhawm.

SHC hian tih theih chin leh huam chin a nei a, thlan tlinte'n tih theih chin an nei a; chu'ngte chu hriat chian a ṭha. Tlin duh luat avanga tih theih chin piah lam thleng thlenga mipui hnena intiam ang chite awm lo thei se. Mizoram sorkar hi sum leh paiah a harsa a, tih theih àwm tak pawh tih theih loh a nei mai thei; chu'ngte hre reng chung chuan campaign ni se. Thlan tlinte tana phurrit ni zui thei tur te, mipuiin an hmuh nikhualoh phah leh theihna tur ang chi-ahte inven a ṭha ang.

SHC hi Zo hnahthlak hnam péng ṭhenkhat (sub-tribe) tamna hmun ni mah se, chi bing politics erawh khelh loh ni se, kan ram leh hnam kal zel tur atan a ṭha zawkin a rinawm. SHC inthlan awm tur atana tute emaw tlin theihna tura beitu zawng zawngte'n Kristian an nihna hre rengin, Pathian lawm tlak leh malsawm tlakin, thianghlim takin hma la ṭheuh rawh se.